Papaya – Diasabra atardi polis a bay un adres na Papaya pa un problema serio di pareha, unda cu un a wordo herida cu cuchiu.
E adres aki ta uno no desconoci pa autoridad pa locual ta violencia domestico. Riba varios ocasion polis mester a entermedia pa motibo cu e cabayero a agredi su pareha. Awe e dama lo a bisa ‘ta basta’.
Pa mas o menos 5’or polis ta yega na e sitio, y mesora ta detene un hende muhe y a pidi transportwagen.
Por a mira polis cu e arma cu a wordo usa, cual ta un ‘butcher knife’ basta grandi. E homber tawata para na su pick up cora y por a mira cu e ta herida na su man.
Segun e dama tawata mustra polis cu e homber tambe lo a dal e patras di cabes, pues tur dos a haya sla.
Transportwagen a yega y a traslada e dama pa warda di Shaba, e dama tawata yora y tawata emocional prome cu transportwagen a yega.
A pidi pa ambulance y tambe pa demas autoridadnan, manera recherche y BFTO.
E dama awor ta enfrenta cargonan di maltrato y/of intento di asesinato.
Na warda recherche lo sinta cune y tende su banda tambe.
Ambulance a opta pa bay Hospital cu e homber, debi na e herida serio cu ela ricibi di su pareha.