Surpasando 1 miyon den capacidad di asiento: 2018 tabata un otro anja exitoso pa Aeropuerto di Aruba

ORANJESTAD – Aruba Airport Authority N.V. (AAA) ta contento pa comparti cu 2018 a resulta den un otro anja exitoso pa loke ta cifranan di Revenue Generating Passenger (RGP) pa pasahero- y buelonan comercial. Cifranan di RGP pa pasaheronan comercial a subi cu 1.7% y e cifranan di RGP pa buelonan comercial a subi cu 8.7% compara cu 2017.
Adicionalmente, Aeropuerto di Aruba a logra un otro milestone den 2018 door di surpasa 1 miyon den capacidad di asiento pa prome biaha den historia. Aeropuerto di Aruba ta un di e aeropuertonan di mas druk den e region di Caribe, cu 29 diferente aerolinea cu ta contribui na e procesamento di mas di 2.5 miyon pasahero pa anja.
Aeropuerto di Aruba a logra sigura aerolineanan nobo y destinacionnan nobo durante e anja cu ta tras di lomba, ademas di frecuencianan adicional for di aerolineanan partner existente.
Merca a conose buelo regular adicional riba diasabra for di New York y Boston door di JetBlue, cu “aircraft yield” mas halto den totalidad y e esfuersonan di branding pa e destinacion a yuda aumenta e fluho di trafico di pasahero. Un highlight di 2018 tabata e anuncio di 2 buelo di American Airlines for di Dallas/Fort Worth International Airport y Chicago O’Hare International Airport. Dallas no solamente ta representa un gateway nobo den e area mid-West, pero tambe coneccionnan mas leu cu e destinacion pa yega den e mercadonan West manera Los Angeles, Las Vegas y San Francisco. Banda di esei, Delta Air Lines y Sun Country a anuncia e introduccion di servicio aereo for di Minneapolis riba diasabra den siman (nobo). Tambe, American Airlines a anjadi un tercer buelo diario pa e temporada di winter pa servicio entre Miami-Aruba banda di e 2 buelonan non stop nobo riba diasabra for di Dallas y Chicago pa Aruba cu a wordo anuncia mas trempan den anja, American Airlines ta expandiendo nan presencia cu un tercer buelo diario for di Miami – Aruba. E aerolinea a anjadi en total 85 buelo pa e temporada di winter pa un total di 13,800 asiento adicional. E ruta lo wordo opera pa un avion tipo B737 – 800. Actualmente American Airlines ta opera 2 buelo diario for di Miami, buelonan diario dobbel (14x) for di Charlotte y 5 buelo semanal for di Philadelphia. Pa e temporada di winter benidero incluyendo tur servicio nobo for di Dallas, Chicago y e tercer frecuencia di Miami; Aeropuerto di Aruba lo tin un total di 42 buelo semanal di American Airlines pa Aruba.
Delta Air Lines, encurasha pa e “load factornan” halto a comberti e servicio temporal riba diasabra di Boston-Aruba pa servicio regular pa henter anja.
“E cifranan ta sigui indica cu e esfuersonan haci pa percura pa e Desaroyo continuo na Aeropuerto di Aruba ta duna fruto. Como ekipo nos por ta hopi orguyoso di sera un otro anja exitoso y ta ansioso pa 2019. Nos ta spera servicionan adicional cu lo beneficia e destinacion y e pasaheronan cu ta en busca di mas opcion pa biaha pa y for di Aruba,” asina AAA su Air Service Development Manager Sra. Jo-Anne Arends a comenta.