Fraccion di AVP den parlamento, a dirigi un total di 25 pregunta na Minister di Asuntonan Social, Glenbert Croes, relaciona cu su plan di crisis y e forma con ta atende cu e fondonan cu tin mas c’un aña caba ta wardando riba ehecucion di e plan di crisis social.
Lider di fraccion di AVP, sr Marlon Sneek a mustra cu fraccion berde a dirigi un total di 25 pregunta na e minister concerni, sigur despues di a mira un serie di propaganda den medionan di comunicacion, relaciona cu cosnan cu ta wordo ehecuta pero caminda Parlamento ainda no a haya contenido di e plan aki.
“Fraccion di AVP a yega di entrega un amienda den cual nos ta bisa e minister aki cu su persona mester manda informacionnan pa Parlamento, pa splica kico y con e placa di e fondo aki ta wordo gasta y nos ta mira cu parlamento no a ricibi ningun informacion al respecto.
Si nos por mira cu diferente instancia ta sacanado cifra y e cifranan aki no ta klop cu otro y pa nos esaki ta un tema hopi serio sigur despues cu e gabinete aki a hunga politica cu e asunto aki.
Fraccion di AVP ta bay pone e lupanan riba e asunto aki y nos a manda 25 pregunta, sperando cu pronto nos lo haya contesta riba nan tambe pa asina nos haya claridad di kico tin realmente pasando den veld y si ta wega atrobe ta wordo hunga pa por haci politica cu esaki.
Banda di e preguntanan aki nos a manda pidi un reunion caminda nos fraccion kier tambe banda di minister Glenbert Croes y tambe minister presidente Evelyne Wever Croes den Parlamento pa asina nos por papia di kico ta bay pasa cu e grupo di 37 trahado di Oduber Contractors kendenan a perde nan trabou pero caminda nos por a compronde tin hopi mas retiro mas na caminda.
Nos kier sa kico gobierno ta bay haci cu e situacion aki ya cu ta mesun mandatarionan aki ta esunnan cu a grita ‘trahado prome, mester salvaguardia nos trahadonan’ pero awe por ripara cu ti trahadonan cu tin lunanan sin cobra y awor ta perde nan trabou. Niun rato nos por a tende algo di e minister di labor y tampoco di e minister cu ta encarga cu energia, kende automaticamente ta atende tambe cu e parti di refineria, esta premier Evelyne Wever Croes.
Pa fraccion di AVP e ta algo inaceptabel cu nos ta mira con un cos ta cana di e forma aki, caminda prome minister mes a gaba cu 35 miyon a caba di wordo inverti y cu despues di e problemanan cu a surgi lo bay sigui y cu entre otro el a manda carta New York den cual el a pidi pa laga e placanan cu tin beslag riba dje di CITGO liber, pa asina e proyecto por sigui.
Pero loke nos ta mira ta cu trahadonan ta bayendo cas y kendenan tin par di luna sin cobra, kendenan mester paga hypotheek, mester paga personalloan, cu tin cu paga gastonan di estudio di nan yiunan, pues pa fraccion di AVP esaki ta algo alarmante y pesey nos a pidi un reunion mas pronto posibel pa asina por haya claridad riba e asunto aki.
Principalmente tambe pa e trahadonan mes haya claridad ya cu manera tur hende sa via di socialmedia ta tur dia ta haya pregunta, tur dia ta haya inquietudnan aki y tin hopi trahado cu a cuminsa acerca nos caba cu hopi preocupacion pasobra nan tabata pensa cu nan lo sigui traha y cu e placa lo yega pero awor placa no a yega y doño di trabou a manda nan cas riba dje.
Ta algo cu sigur tin nos atencion y nos a manda pidi un reunion riba e asunto aki pa minister bin duna claridad riba kico realmente a pasa caminda tanto luna a pasa cu trahadonan a haya nan mes den e situacion aki.
Aki tin cu corda cu den pasado cu mesun mandatarionan aki ora cu casino di Occidental a dal cera, cuanto desorden nan a crea, puntrando con esaki por ta posibel y sigurando cu e cosnan aki lo no pasa bou di nan gobernacion pero awe increiblemente un grupo di trahado ta wordo manda cas, sin cu nan ta haya un debchi y no di un luna so, pero di un par di luna.
Pa AVP ta un asunto sumamente serio y importante y pa tal motibo nos a solicita un reunion cu e ministernan aki pa asina nos por haya mas informacion riba e tema aki,” lider di fraccion di AVP, Marlon Sneek a declara.