Cu ayudo di Estonia esaki lo wordo implementa pa brinda servicionan mas eficiente pa nos pueblo
Prome Minister e siman aki, a duna un splicacion hopi ampio riba eGovernment y con esaki lo tin un afecto positivo cu e meta cu Gobierno tin pa digitalisa e procesonan den gobierno mas tanto posibel pa asina brinda nos pueblo servicionan hopi mas eficiente.
E siman aki ta uno importante pa Aruba unda cu oficialmente nos ta drenta fase 2 di nos trayecto di eGovernment pa cua motibo nos tin un delegacion di experto di Estonia na Aruba pa conduci un estudio, un ‘fact finding mission’. E delegacion lo yuda Aruba crea un ‘road map’ di implementacion cu ta enfoca riba e proximo 3 añanan pero cu un perspectiva te cu 2030
Fase 1 a cuminsa na mita di 2018 cu un ‘Digital Assessment’ di departamentonan di gobierno unda cu nos a tuma un midi di unda y con nos ta para pa cu IT y innovacion den gobierno. E realidad ta cu tin hopi trabou pa haci. Apesar cu a papia hopi di innovacion den e gobierno anterior, sinembargo no tawata tin un vision, plan y mucho menos ehecucion. Tin departamentonan cu ta den hopi condicion y a sa di innova casi bo por bisa riba nan mes durante e gobernacion anterior, pero tin hopi otro departamento cu ta den estado critico of neglisha.
Fase 1 a termina na Januari di 2019 – unda cu un delegacion di gobierno a bay Estonia pa 4 dia di workshops intensivo pa locual ta implementacion di eGovernment.
Estonia ta e lider na mundo den eGovernment y transformacion digital y nan a yuda mas cu 60 pais den nan trayecto, hasta Hulanda ta consulta Estonia den e procesonan aki. Nan a manda un delegacion hopi pisa Aruba door cu nan ta mira Aruba su seriedad pa cu e proyecto aki y nan tambe ta kere cu Aruba por bira un modelo pa Caribe y Latino America.
Hopi lo puntra dicon eGovernment ta importante. E realidad ta cu eGovernment tin varios beneficio pa cualkier pais.
eGovernment lo caba cu Burocracia – lo kita e redtape cu tin cu ta stroba nos economia. Redtape ta e diferente pasonan cu mester pasa pa entre otro haya permiso of pidi algu cu un persona tin derecho riba dje
eGovernment lo trece mas eficiencia den gobierno cu ta crea mas oportunidad pa innovacion y tambe mas productividad den Aruba su economia en general.
eGovernment lo produci mas transparencia y lo yuda cu elimina corupcion ora cu tur of mayoria transaccion di gobierno haya un ‘footprint’ digital.
eGovernment lo stimula creacion di maneho a base di dato y informacion corecto.
eGovernment lo crea un miho calidad di bida pa nos ciudadanonan. No por ta asina cu ora e ciudadano mester di un papel simpel e tin cu cana di un departamento pa otro pa colecta stempel – esaki ta un ehempel. Gobierno su meta ta pa brinda tur servicio principal online, pa asina e hende tin mas tempo pa su famia, pa su trabou, y pa otro cosnan cu ta mas importante den su bida.
eGovernment ta importante pa nos trece gobernacion den siglo 21.
Con largo esaki lo dura?
Prome Minister a indica cu esaki ta un trayecto largo cu su metanan pa 2030. Lo dura sigur entre 5 pa 10 aña pa por mira e impacto di mas grandi, pero den un aña ya lo por cuminsa sinti e efecto di e trabounan haci.
Importante pa bisa ta cu esaki lo wordo haci den fase. E prome fase, e proximo 3 aña lo ta pa set up e fundeshi y asina lo keda traha den fase di 3 aña te ora nos tin un Gobierno cu ta 99% Digital.
“E trayecto no lo ta facil, pero nada cu tin impacto grandi y cu ta rekeri cambio di maneho y pensamento ta facil. Pero e impacto ta asina grandi pa nos pais cu nos tin cu tuma pasonan firme pa cuminsa cu e caminda. Mi ta 100% para tras di e proyecto aki y mi ta kere cu ora e plan cuminsa bira mas concreto / y tin mas claridad pa sector priva y sector publico mes, nos lo tin un grupo mas grandi ainda cu lo carga esaki, Prome Minister Evelyn Wever-Croes a enfatisa.
Gobierno ta trahando riba un road map, cu ta e plan di eGovernment y con esaki lo wordo implementa, y cu lo wordo publica rond di luna di juni aunke cu ya cierto trabounan (‘voorwerk’) a cuminsa caba, entre otro ‘quick wins’ y cierto ‘apps’ cu lo ta cla prome cu esey.
Prome Minister a duna di conoce cu den e proximo simannan lo duna mas informacion tocante e topico aki cu sigur ta hiba Aruba na un nivel mas eficiente di duna servicio na pueblo, cumpliendo asina den innovacion cu e meta di Gabinete Wever-Croes pa pone e ser humano central.
