Parlamentario di Fraccion di POR, Alan Howell durante conferencia di prensa semanal a elabora riba e verkeersplateaunan nobo cu ta wordo traha riba diferente careteranan rond di nos isla.
El a indica cu minister di Infrastructura y DOW a haci algun test case riba un modelo nobo y esaki a cay den masha bon tera den nos comunida. Esaki debi cu tin por lo menos 300 peticion haci na gobierno na diferente bario unda cu ciudadanonan ta sclama pa e verkeersplateaunan bin, debi na e automobilistanan cu ta core masha duro y mester di siguridad pa tur habitante, en especial di nos muchanan cu ta riba caya.
Howell a expresa cu e bon noticia ta cu por a compronde for di minister cu a haya un formula mas barata pa traha e verkeersplateaunan, pero mesun efectivo y esaki ta e caminda cu mester bay. Den Parlamento Fraccion di POR a pidi minister durante reunionnan publico pa bin cu mas verkeersplateu, pero esaki tabata dificil debi cu e presupuesto cu tabatin pa esaki no lo a yega pa cumpli cu e demanda di comunidad. Anteriormente construccion di un solo verkeersplateau tabata costa alrededor di 16 mil Florin, pero awo cu e formula nobo cu DOW a haya e construccion ta sali un 70% mas barata y ta trece un alivio pa e caha di pueblo y asina tambe por traha mas verkeersplateau den corto tempo y den diferente bario.
Por a compronde for di minister y DOW cu tin tin dos diferente verkeersplateau, un chikito y un grandi. E chikitonan ta bin mas tanto den barionan y e grandinan den camindanan mas grandi/principal. E chikito tin un costo di alrededor di 3 mil Florin y e grandinan cu ta entre 4 mil pa 5 mil Florin.
Alan Howell ta di opinion cu por mira cu di berdad e solucion cu e gobierno actual ta treciendo ta haci un gran diferencia. “E cambio aki ta haci un diferencia grandi mirando cu antes e tabata costa 16 mil Florin y awe e ta entre 3 mil pa 5 mil Florin. Esaki ta e manera pa traha!”
E test case a tuma lugar na Mangel Halto y e parlamentario di POR por a compronde cu e tabata efectivo, e ta pinta blanco y tin bliksem algun meter prome cu yega e verkeersplateau pa por avisa e automobilistanan cu nan ta acercando un verkeersplateau.
“Nos ta desea di mira den tur bario e verkeersplanteaunan aki cuminsa aparece y di akinan tambe den nomber di e barionan cu a pidimi awe mainta ta pidi DOW y minister pa un extra atencion pa e barionan di Palesiaweg, Mabon (e caya grandi di Mabon), caya Jose Geerman (Congoweg), Weg Seroe Preto y cayanan cu ta forma parti di Lago Heights, entre otro”, Alan Howell a finalisa bisando.
