Cu honda pena y dolor partido MEP a ricibi e noticia di fayecimento di un gran musico Arubano, specialmente conoci riba e tereno di saxofon y instrumentonan di blas, sr. Lucio Rivadeneira. Lucio ta un gran persona, musico cu desde e promer vez cu nos a toca himno di Aruba “Aruba Dushi Tera” riba dia 18 di maart 1976 den Wilhelminastadion, tur aña hunto cu e orkesta filharmonico ta toca nos himno ariba nos dianan nacional.
Alabes mester recorda cu dia Betico Croes (dfm) a funda MEP dia 9 februari 1971, el a duna tur su confiansa na sr. Rivadeneira pa haci e musica y areglo di e himno di MEP y cual a wordo graba riba un disco 45 rpm. Y te cu awe e himno aki a keda bibo den nos comunidad, danki na e bunita trabao di sr. Rivadeneira.
Di parti di MEP nos ta gradici Lucio pa tur su trabaonan haci riba tereno musical y cu nos Creador duna bo un bon lugar di sosiego den su Reino. Na su familia hopi forza den e momentonan dificil aki.
