ORANJESTAD – Minister di Finansa, Asuntunan Economico y Cultura, Xiomara Ruiz-Maduro a haci apertura di e Mini -simposion ‘Inovacion den Enseñansa na Aruba’ cu a tuma luga riba Dia Internacional di Idioma Materno. E Mini-simposio a wordo organisa pa Fundacion Lanta Papiamento conhuntamento cu Minister di Enseñansa, Dr. Rudy Lampe.
Minister di Cultura Ruiz-Maduro a enfatisa cu e aña aki UNESCO a declara como Aña Internacional di Idioma Indigena y e tema di e Aña aki ta dedica na e lenga materno di e pueblonan indigena. E mandatario a sigui bisa cu segun International Labour Organisation (ILO) e definicion pa hende indigena ta cu un persona cu ta descendiente di un poblacion cu a biba na un pais of region durante e periodo cu a conkista of colonisa nan teritorio. Mientras cu nan a mantene nan propio bida social, economico, cultural y politico. Den e sentido aki Aruba, mescos cu tur e otro islanan den Caribe tambe por ser indentifica como un nacion indigena, paso Aruba ta forma parti di e Reino Hulandes cu ta nos colonisador, manteniendo nos propio idioma nacional, esta nos idioma Papimento.
E meta prinicipal pa celebra Dia Internacional di Idioma Materno ta pa promove diversidad linguistico y educacion multi-lingual. Netamente e diversidad cultural y linguistico aki a mantene nos idioma materno bibo. Apesar cu ta awor nos ta bay structura y oficialisa educacion multi-lingual den nos enseñansa, mayoria di nos educadornan ta papia dos idioma cu e alumnonan den klas.
E slogan di Aña Internacional di Idioma Indigena ta bisa: Ta pa medio di nos idioma nos ta mustra ken nos ta. Esaki ta conta pa tur idioma materno. No ta importa ki bo idioma materno ta, na momento cu bo cuminsa papia, nos ta haya sa for di unda bo ta; esta si bo ta un Arubiano, Curasoleño of Boneriano. Kiermen bo lenga materno ta identifica di unda bo ta.
E dignatario a informa tur presente cu for di aña pasa cu tabata e Aña di Papiamento, Gobierno di Aruba a pone un presupuesto disponibel pa garantisa e continuidad di e Feria di Papiamento. Cu e fondo aki Departamento di Cultura conhuntamente cu Fundacion Lanta Papiamento lo por sigui organisa tur aña, un Feria di Papiamento.
Awe riba Dia Internacional di Idioma Materno nos ta para keto riba e bon uso di nos Papiamento. Minister di Cultura a acentua pa ban sigui consientisa e bon uso di Papiamento. Como parti di nos cultura, nos mester cuida uso di nos Papiamento.
E mandatario a felicita un y tur cu e Dia Internacional di Idioma Materno y a yama Danki na Fundacion Lanta Papiamento, Departamento di Cultura y na un y tur cu ta yuda salvaguardia nos dushi idioma materno.
