Lider di fraccion di POR den Parlamento, Marisol Lopez-Tromp a informa prensa cu recientemente Comision di Asuntonan Social y Salud a realisa un bishita na Ambiente Feliz, e fundacion pa esnan cu tin limitacion mental. Durante e bishita aki a haya un recorido no solamente di e edificio, pero tambe di e calidad di bida di e clientenan, kico ta nan necesidadnan, pero tambe kico ta e retonan cu e trahadornan ta haya nan mes cu nan.
Lopez-Tromp ta bias cu esaki no ta e prome biaha cu ta topa cu instancianan cu tin di haber cu esnan cu limitacion, anteriormente a topa cu esnan di SVGA unda cu nan a indica cu tin un escasez grandi di cas pa esnan cu limitacion.
Na e momentonan aki a tuma nota di e retonan cu esnan di Ambiente Feliz tin, tur e trabounan cu nan ta eherciendo, con tur e trahadornan ta haciendo nan maximo esfuerso y pa esaki sigur Marisol Lopez-Tromp a indica cu tin hopi aprecio pa cu esaki, mescos cu pa e otro trahadornan di hopi otro fundacion cu tambe a invitanan pa haya un bista di nan situacion pa asina e parlamentarionan por prepara miho cu ta posibel pa e siguiente presupuesto y pa percura pa tur e fundacionnan social por cumpli cu e necesidadnan basico di esnan mas vulnerabel den nos comunidad.
