Diaranson 6 di februari Stichting Monumentenfonds Aruba (SMFA) a organisa un paseo pa e Minister di Cultura di Hulanda señora Ingrid van Engelshoven.
Esaki a tuma lugar den cuadro di e bishita cu e minister a haci na e parti Caribe Hulandes di reino y den preparacion pa e Vierlandenoverleg cu a tuma lugar dia 8 di februari na Curaçao.
Primeramente a bishita e Museo Arquelogico cual lamentablemente ta cera pa publico ainda.
Apesar di esaki toch e minister a logra haña un bon impresion di e museo y e compleho di monumentonan cu ta forma parti di esaki. Akinan a haña un rondleiding di e team di e museo mes.
For di e promer piso e Minister a haña un bista for di ariba di e bario di Rancho y Clifford Rosa, presidente di Fundacion Rancho, a duna informacion tocante e trabounan di e fundacion pa mantene e aspecto cultural di e bario.
E di dos parada tabata na ‘Huisje Wild’, cual ta un monumento cu ta propiedad di SMFA y cual te cu aña pasa tabata ocupa pa Utilities NV. Actualmente e edificio ta bashi y SMFA ta buscando un huurdo nobo pa esaki. Akinan tambe e Minister a cera conoci cu e directiva y team di SMFA.
Por ultimo a cana cu e Minister direccion di Stadhuis caminda cu a duna mas splicacion di e diferente monumentonan riba e ruta. Señora Sharin Luydens, directora di Bureau Burgerlijke Stand en Bevolkingsregister a ricibi e Minister y su delegacion.
SMFA a gradici tambe e Minister pa e apoyo cu e fundacion a ricibi pa años caba den forma di prestamonan na interes abou for di Hulanda. Danki na esaki a logra restaura diferente Monumentonan na Aruba. Abase di conscientisacion tocante e herencia comparti di Aruba y Hulanda por crea un base solido pa cooperacion pa asina por preserva nos pasado pa futuro.
