ORANJESTAD – Dialuna mainta Minister di Deporte sr. Dangui Oduber hunto cu lider di fraccion di MEP sr. Rocco Tjon y miembro di fraccion di MEP sr. Edgard Vrolijk y sr. Percy Felipa a anuncia un bunita proyecto pa San Nicolas. Minister Oduber a splica cu lo bay converti ex Prinses Christina School den un facilidad multifunctional pa atrae e muchanan di San Nicolas pa bin haci actividadnan fisico.
E proyecto aki lo bay ta un proyecto cu lo wordo ehecuta den tres fase.
E prome fase di e proyecto lo ta un compleho deportivo unda cu lo pone canchanan di beach soccer, beach tennis y beach volley hunto cu un tribune y espacio cubri, pa esnan cu ta haci uzo di e facilidad. Tin un area cu tin sombra tambe na dje. E prome fase lo cuminsa den e luna di maart y lo dura 3 luna di tempo.
Siguiente fasenan lo drecha e scol y haci’e un facilidad multifuncional, unda cu por haci actividadnan deportivo, musical y otro actividadnan, pa asina San Nicolas por haya un facilidad nobo y diferente cu por haci uzo di dje.
Ex Prinses Christina School a wordo neglisha pa hopi aña y e ta den un super mal estado. Apesar cu Fundacion Lotto Pa Deporte ta secuestra y e problema financiero cu e gobierno aki a hereda segun a logra aloca fondonan necesario pa e proyecto chikito aki cu lo tin un impacto grandi pa e bario y districto di San Nicolas.
Nos ta pone e hende central y nos ta percura pa nos hobenan tin un mihor perspectiva di bida na Aruba. Di e manera aki nos ta cumpli cu nos mandato.
