ORANJESTAD – Minister di Finansa, Asuntonan Economico y Cultura Sra. mr. Xiomara Ruiz-Maduro a ricibi bishita di Sr. Jurriaan Middelhoff kende ta Embahador Suplente pa Reino Hulandes na Panama. E meta di su bishita na Aruba ta pa drenta den contacto cu representante di comercio y gobernacion pa asina indica con Embahada Hulandes por yuda pa fomenta negoshi entre Panama cu Aruba.
Durante e encuentro Minister Ruiz-Maduro a splica Sr. Middelhoff riba e 6 sectornan prometedor pa inversion cu a keda identifica pa Aruba. Un punto cu a bin dilanti tambe ta e interes cu algun compania na Panama tin den e experticio di Aruba riba e tereno di turismo. E ta recomendabel pa companianan interesa den haci negoshi na Panama pa tuma contacto cu e Embahada Hulandes pa asina nan por wordo guia y haya sosten den esaki.
