Parlamentario Endy Croes ta siguiendo e desaroyo di Lotto pa Deporte di cerca. Amigonan di Mike de Meza, Benny Sevinger, Mike Eman y Schwengle ta esnan cu a wordo poni den e modelo nobo di un Statuut cu nan a cambia ultimo ora despues di eleccion di september 2017. Pa ta exacto 19 di october 2017 – momento cu Coalicion tabata negociando un programa di Gobernacion nobo – e sinberguensanan aki cu ayudo di un Professor Frank Kunneman y Notario a cambia e Statutonan. E modelo nobo cu a crea ta un modelo di un Raad van Toezicht. Den tur maniobra aki Distefano Wernet kende tabata Presidente di Bestuur di Lotto aparentemente a ricibi un volmacht di Bestuur pa e por a actua den nan nomber pa cambia e Statutonan. Momento cu e acta a pasa y e Statuut nobo a bin na vigor 19 di october 2017, Distefano Wernet a baha como Presidente. Cu cooperacion di Schwengle a nombra e mesun miembronan di Bestuur kende a wordo nombra desde 2009 pa Mike de Meza como Miembronan nobo pa e Raad van Toezicht.
Violacionnan di Statuut di Lotto
Artikel 5 di e Statuut ta stipula cu Raad van Toezicht ta nombra un Directeur pa tempo indefini (voor onbepaalde tijd). Guess What Pueblo. Grawata mi lomba pami grawata esun di bo. Raad van Toezicht a nombra Distefano Wernet como e Directeur (Bestuurder) cu un salario di 20 mil pa luna pa tempo indefini.
Recientemente Raad van Toezicht a pega cu nan amigo y ata awor nan mes ta schors e y a mand’e cas siman pasa. Het kan verkeren! Raad van Toezicht ta esnan responsabel pa e Stichting. Artikel 11 ta stipula hopi cla cu dentro di 6 luna despues di aña calendario Raad van Toezicht MESTER yama un “Jaarvergadering”. Artikel 11 Lid 3 ta splica cu durante e reunion aki e Directeur (esta Distefano Wernet) mester presenta na e Raad van Toezicht un Jaarrekening cu tur toelichting pa un aprobacion. Tambe artikel 16 Lid 3 ta stipula cu e Directeur ta “verplicht” pa dentro di 3 luna despues di aña calendario pa hiba un debate alrespecto esaki cu Raad van Toezicht. Despues cu Raad van Toezicht aproba e jaarrekening e Directeur ta haya su décharge. Tambe artikel 16 Lid 7 ta stipula cu dentro di 7 luna despues di aña calendario, pues momento cu jaarrekening lo mester ta aproba y cu e Directeur ya tin su décharge mester entrega e Jaarrekening na Minister di Deporte. Wel no spanta pueblo. No a cumpli cu net net nada di esaki alrespecto.
Boso ta compronde boso responsabilidad?
Ta con CBN un compania renombra ta permiti un pocho pocho asina? Ultimo Jaarrekening cu tin ta data di aña 2013. Ta con bo por rond un compania sin cifra y sin data? Anto e propio Distefano Wernet cu conscientisacion di Raad van Toezicht ta cobra alrededor di 8000 florin extra pa luna pa cera bukinan di Lotto. Raad van Toezicht ta na altura cu nan tampoco ta cumpliendo? Di acuerdo cu Statuut cu boso mes a cambia “UITERST” juni 2018 boso mester a aproba jaarrrekening 2017 y na juli 2018 mester a entrega un copia na Minister di Deporte. Boso ta compronde boso responsabilidad? Flavio Faneyte, brother di Benny Sevinger y empleado di Elmar NV, bo ta compronde? Eli Kock bo ta compronde cifra y bo responsabilidad? Da Sousa, un abogado casa di Desiree Croes di AVP mester por sa mucho mihor, bo ta compronde? Silvio Janga “pell” di Mike de Meza bo ta compronde? Taxista Antonio Kamperveen amigo intimo di Mike Eman, bo ta compronde bo responsabilidad? Boso tur a djodjo y ta spera boso para responsabel cu orguyo. Boso dianan ta conta y pueblo lo haya sa e disaster, corupcion y ladronicia cu boso sea a comete y of a tolera. Tik tok tik tok tik tok, Croes ta termina bisando.
