Minister Oduber a recorda cu e proceso pa yega na un director nobo, a cana un caminda hopi transparente y hasta a bay riba rednan social. Esaki a causa tambe cu e interes pa e puesto aki tabata basta halto. A base di e consehonan cu a ricibi, Gobierno a scoge pa Mark Figaroa, kende ta un hoben profesional bon prepara. “E tabata un di e miho candidatonan entre e grupo selecciona.”
Tabata presente na e ceremonia di dialuna mainta e director saliente ing. Jossy Figaroa, miembro di gerencia Humphrey Tromp, y miembronan di Hunta di Comisario. Esaki tabata e prome dia oficial di sr. Figaroa como director nobo di APA. E entidad aki ta hunga un rol importante den economia di Aruba, ricibi rond di tres kwart miyon turista crucero anualmente y percurando pa un entrada importante pa Gobierno di Aruba, e mandatario a declara e mainta aki. Ademas di e terminal crucero, APA ta encarga tambe cu e terminal di carga na Barcadera.
E mandatario a probecha pa gradici ing. Jossy Figaroa pa e tremendo trabou cu el a bin ta desplegando e ultimo cinco añanan y a recorda cu e lo keda ainda pa un periodo cortico pa yuda finalisa un aspecto importante di e proyecto grandi cu tin pa haf di Playa y pone e director nobo na altura di tur loke ta tumando luga awo den e empresa estatal aki. “Ta importante pa e siña tur loke ta e maneho di APA y despues e mes lo pone su stempel den esaki.”
Marc Figaroa di su banda ta sinti su mes hopi orguyoso di a wordo escogi pa ocupa e puesto aki entre tur e candidatonan. P’e personalmente e ta un reto nobo cu el a tuma den su carera. Di loke el a mira te awor ta mustra cu APA ta un compania bon estableci, “y cu hopi entusiasmo mi lo traha pa hiba APA padilanti na bienestar di Aruba.” Ya caba den su pensamento ta pa traha pa expande turismo crucero y mehora algun area. “Sr. Jossy Figaroa a laga un sabi grandi pa mi bisti pasobra e trabou cu el a laga atras ta hooi grandi y ami lo tin e tarea pa sigui hiba e empresa aki padilanti.”
Un di e retonan grandi cu Figaroa ta bay haya su mes cun’e ta pa realisa e proyecto “Port City” cu na final di e aña’ki ta bay den ehecucion y lo tin un duracion di 15 aña. “Den esaki nos mester di cooperacion di henter e team di APA. Mi a sinti cu nan ta kere den e proyecto aki y ta sinti nan mes hopi motiva. Esaki ta dunami un satisfaccion y pa cual mi por bisa cu nos ta cla pa e reto.”