Diaranson miembronan di Fraccion di POR, Marisol Lopez-Tromp y Alan Howell a realisa un bishita di trabou na Carnival Village pa mira y inspecciona con e trabou ta bayendo. Carnival Village su obhetivo ta pa trece comunidad hunto pa diferente eventonan, manera cultural y deportivo, recreativo, entre otro.
Alan Howell a bisa cu ta increibel pa wak e animo cu e trahadornan ta trahando cune, no solamente pa por tin trabou y pone pan riba mesa, pero tambe e deseo di finalisa e proyecto y wak con bunita e lo keda.
Nan a papia tambe cu e subcontratista di e proyecto, kende ta un mucha homber di San Nicolas, lo cual ta yenanan cu orguyo y gran satisfaccion pasobra ta mira cu e atencion cu gobierno ta duna na San Nicolas no ta solamente pa embeyece Carnival Village. Ta mira cu habitantenan hoben di San Nicolas ta haya trabou y esaki ta un di e partinan mas importante pa Alan Howell y den e proyecto aki mayoria di e trahadornan ta di San Nicolas.
Carnival Village ta un proyecto cu gobierno anterior a cuminsa cune, pero lastimamente pa un of otro motibo e la keda asina. Na momento cu gobierno nobo a sinta y Alan Howell cu ta un di e personanan cu ta pusha duro pa San Nicolas a drenta Parlamento, el a para duro y persisti cu e kier mira un cambio den Carnival Village.
Den Parlamento semper e ta vocifera su deseo fuertemente di mira cambionan den San Nicolas, cu e kier mira un diferencia den San Nicolas y awe por mira caba e diferencia cu minister Otmar Oduber ta haciendo pa San Nicolas. E ta siguiendo cu e otro fasenan cu mester a sigui den Carnival Village.
Un di e aspectonan nobo ta cu lo tin un muraya cu lo ta un sorpresa cu lo tin nomber di cierto artistanan y esaki lo bira e entrada pa Carnival Village. Tambe por mira cu nan ta trahando dos loket cu lo por wordo uza pa bende ticket. Despues cu e parti aki keda cla, pa dia 11 di februari nan lo cuminsa cu construccion di e kioskonan y e bañonan. E siguiente fase lo bira e construccion di un stage permanente.
Miembronan di fraccion di POR ta contento cu ya caba por mira un diferencia den Carnival Village cu ta hayando un mehoracion grandi riba lo cual tabatin antes y cu keto bay ta conta cu e machinnan pa haci ehercicio cu tabat ey.
E prome fase di e proyecto mester keda cla pa diabierna awo y miembronan di fraccion di POR ta spera cu esaki lo por tuma lugar pa despues continua cu e siguiente fasenan.