ORANJESTAD – Diamars atardi Minister di Finansa, Asuntonan Economico y Cultura a lansa e website nobo di Departamento di Asuntonan Economico (DEACI) durante un encuentro cu e personal y medionan di prensa.
E mandatario a splica cu e website nobo www.deaci.aw di Departamento di Asuntonan Economico ta contene mas informacion riba diferente tereno di economia. Ademas di informacion nobo, awor ta facilita e personanan cu kier haci un cita na DEACI.
Minister Ruiz-Maduro a informa cu for di dialuna awor, 4 di februari por haci un cita pa un permiso di negoshi, atrabes di e website nobo www.deaci.aw y asina reduci e tempo di warda pa wordo atendi na e oficina de Departamento di Asunto Economico.
DEACI a tene cuenta tambe cu por tin persona cu no tin aceso na computer y pesey e funcionarionan na DEACI ta atende publico riba diaranson solamente, na e oficina Sun Plaza Building.
E dignatario a splica cu e website nobo tambe ta contene informacion tocante cua documentonan mester trece pa cada tipo di peticion pa permiso di negoshi y alabes por yena un formulario di peticion. Actualmente ainda e formulario mester wordo geprint y treci personalmente na DEACI. Ta bon pa menciona cu e Departamento di Asuntonan Economico ta trahando riba formularionan digitalisa (e-form) cu lo por wordo manda via di e website mes.
Tambe riba www.deaci.aw tin informacion riba prijsnan di entre otro e productonan den Canasta Basico, Macuto di Compras y prijs di gasolin y diesel.
Ainda falta algun informacion riba e website, Departamento di Asunto Economico lo keda traha duro pa inclui mas informacion riba nan website nobo y lo keda mantene esaki al dia (‘up to date’) constantemente.
E website ta gelink na diferente otro website cu informacion di otro instancianan/stakeholders, pa di e manera aki haci e buskeda di cierto informacion mas facil.
Minister Ruiz-Maduro a informa cu e website nobo aki ta djis e inicio di e prome fase di e-government, e digitalisacion di servicio cu Gobierno kier bay, pa asina nos por brinda un servicio mas rapido y eficiente na nos comunidad.
E mandatario a termina yamando danki na tur e coleganan cu a traha duro riba e website y logo nobo. Alabes a felicita henter e Departamento di Asuntonan Economico tambe cu nan logo modernisa y website nobo.