Diamars, 29 di januari, a tuma luga un reunion importante cu conseho di Minister di Gabinete Wever-Croes pa locual ta trata e planeamento pa cu eGovernment. Varelie Croes, Chief Innovation Officer, a duna un presentacion durante e reunion aki unda cu el a duna un relato amplio di e resultado di un Digital Assessment cu a wordo conduci na 2018 di e infrastructura y organisacion di IT di e aparato gubernamental. E Digital Assessment tabata e base pa fiha e vision di Gobierno pa locual ta eGovernment. E meta principal di un eGovernment ta e calidad di bida di e ser humano. Un gobierno digital lo por opera 24/27 y asina brinda un miho servicio na e ciudadano, crea mas eficiencia den gobierno y sector priva, y asina tambe trece mas transparencia cu lo yuda combati corupcion.
Durante e reunion tambe a presenta e trabounan preparatorio haci te cu awe cu ayudo di Gobierno di Estonia, cu ta e leader mundial di eGovernment y expert den transformacion digital. Den liñanan grandi, tin tres elemento principal cu ta forma e base pa un eGovernment: 1. Identificacion unico digital, 2. Infrastructura di IT, 3. Cuadro di ley.
E proceso pa yega na un gobierno digital lo tuma su tempo y lo rekeri inversion, pero e implementacion lo pasa den fase unda cu lo prioritiza departamentonan y servicionan cu ta critico pa nos comunidad y tambe cu lo stimula nos economia. Importante pa nota ta cu implementacion di eGovernment of un plan nacional digital no ta trabou di gobierno so, pero sector priva lo hunga un rol sumamente importante den esaki, unda cu lo crea oportunidadnan nobo pa desaroyo economico y negoshi. Parlamento tambe lo tin un tarea importante den e proceso aki mirando e impacto grandi cu transformacion digital tin pa Aruba y e cuadro di ley cu ta necesario pa sigura e sostenibilidad di e inversionnan y e proteccion di e ciudadano.
Den e siguiente fase lo tene diferente stakeholder sessions unda cu stakeholders di sector priva, publico, academico y ciudadanonan lo por duna nan input riba e plan di implementacion. Minister President, Evelyn-Wever Croes, cu tin e encargo di innovacion, ta reconoce cu e proceso no lo ta uno facil, pero sigur trahando hunto cu tur e departamentonan, stakeholders y un plan concreto eta convenci cu Aruba y principalmente e ciudadano por cuminsa mira e diferencia den menos cu un aña y asina lo re-establece e confiansa bek cu a perde den e aparato gubernamental.