Lider di Partido AVP, mr Mike Eman a presenta un invitado special di su partido, esta sr Karsten Klein, kende ta un legislado na Den Haag y kende lo ta candidato number tres riba lista di Partido CDA pa e eleccion venidero pa parlamento Europeo.
Den un reunion di Partido CDA dia 9 di februari proximo, sr Klein y otro candidatonan lo wordo presenta oficialment como candidato riba lista di CDA. ExPromer Minister y Lider di AVP, mr. Mike Eman ta orado invita tambe na momento cu e lista di e partido CDA pa proximo eleccion ta worde presenta den un congreso special di e partido..
Durante conferencia di prensa di partido AVP diamars mainta, e lider di partido a mustra cu Karsten Klein tambe lo ta candidato pa eleccion di parlamento Europeo y a mustra cu partido AVP lo sostene e candidatura di sr Klein den Parlamento Europeo.
Sr Eman a repasa un rato e desaroyo cu Aruba a pasa aden pa haya derecho di voto pa ciudadanonan Arubiano, loke antes no tabata e caso pero mirando cu nos ta forma parti di Reino Hulandes, ta dificil pa acepta cu paisnan cu ta forma parti di Reino, ta ser trata den diferente forma cu Hulandesnan Europeo.
El a splica cu su persona y colega Benny Sevinger asesora pa dr. mr Mito Croes den felis memoria a haci un apelacion na Raad van State pa corigi e falta di trato igual aki. Raad van Beroep di Raad van State a manda e caso pa Corte di Apecion di Europa na unda Eman y Sevinger a logra, asesora pa dr.mr. Mito Croes di convence e corte mas halto aki di Europa cu e ley hulandes (Kieswet) mester worde cambia.
A base di esaki Hulanda a cambia e ley y desde 2009 ciudadanonan di e islanan di Caribe cu nacionalidad Hulandes tambe por vota pa Parlamento Europea. E caso huridico aki di derecho civil a bira un parti jurisprudencia importante den Europa y yama caso EMAN-SEVINGER.
Dr. Mr Mito Croes a bira e prome candidato Arubiano cu a participa na e eleccion pa Parlamento Europeo y no tabata falta mucho sosten pa por a wordo eligi cu voto preferencial.
Den ultimo simannan a tuma luga dialogo entre CDA y AVP riba diferente punto di interes mutuo y caminda a yega na un palabracion cu AVP lo sostene e candidatura di Karsten Klein den e proximo eleccion pa parlamento Europeo.
Cu e proceso aki ta sigui trata di estrecha e lasonan cu Union Europeo y den persona di e parlamentario Klein, Aruba por conta c’un representante tambe riba e tereno aki.
Den proximo simannan lo inicia e proceso di informacion riba e eleccion aki caminda lo duna mustra tur ciudadano riba nan derecho di participa den e proceso electoral aki, Mike Eman a sigui mustra y lo splica e proceso cu mester tuma luga pa inscribi pa asina por vota y tin te cu dia 11 di april pa inscribi pa participa den e eleccion aki.
Mike Eman tambe a mustra cu e proceso aki ta otro muestra con mester fortalece lazonan di cooperacion entre Hulanda y Aruba.
Na mes momento Karsten Klein tambe a mustra su satisfaccion pa e cooperacion aki cu tin entre su partido CDA y AVP y a a duna reconocimento pa e desaroyo impresionante cu Aruba a conoce den ultimo añanan bou gobernacion di partido AVP y Gabinete Mike Eman.
Sr Klein a mustra cu tin cierto desaroyonan cu ta un similaridad entre Aruba y Den Haag caminda e ciudad aki tambe ta trahando duro riba e pilar economico di turismo y ta comparti mesun vision di Aruba ora cu ta trata e tema di sustenibilidad.
Karsten Klein a expresa su gradicimento na Lider di AVP, mr. Mike Eman pa e sosten y tur coleganan di partido pa e apoyo.