ORANJESTAD – Minister Xiomara a informa durante di e Conferencia di Prensa di Gobierno con e productonan den e Canasta Basico ta wordo controla debidamente.
Control di Prijs na establecimento
Tur dia e funcionarionan di Departamento di Asuntonan Economico ta controla e productonan di e Canasta Basico. Un biaha pa luna Departamento di Asuntonan Economico, Departamento di Salubridad conhuntamente cu Polis ta haci un control multidisciplinario. E controlnan aki tambe lo wordo intensiva. Por sigui e controlnan aki via medionan social of den corant.
Control di Prijs door di e consumidor
Alabes e mandatario a informa cu pa hacie mas facil pa e consumidor por controla e prijs di e productonan cu tin un maximum di prijs, tin un App Control di Prijs pa tanto telefon Android y telefon Apple. Ariba e App aki tin tur informacion tocante di e prijs di e productonan den Canasta Basico. Tambe tin e lista di prijs di Macuto di Compras cu ta wordo publica den corant tur siman. E Macuto di Compras aki ta contene un comparacion di e prijsnan di 25 diferente producto na 10 diferente supermercado. E productonan aki no ta cay bao di Canasta Basico. Por haya mas informacion di prijs di producto di Canasta Basico y Macuto di Compras tambe riba e pagina di Facebook Departamento di Asunto Economico. Via di e canalnan aki e consumidor mes por haci comparacion di prijs di diferente producto y dicidi na unda e por bay haci su compras. E poder di compra ta keda den e consumidor su man.