ORANJESTAD – Diabierna anochi tabata asina bunita presencia y gosa di e recital di concierto presenta pa un elenco grandi di nos artistanan local acompaña pa un orkestra dirigi pa e maestro Johnny Scharbaay. E gran cantante Nelson Tromp a habri e anochi presentando “Ban sembra Amor” un wals composita pa Ricky Kock. A sigui cu presentacion di Sandra Croes cu su voz unico cu e inolvidabel cancion “Libertador”, un dansa composicion y areglo di Casin Giel. E cantante Javier Ras a presenta un wals titula “Soño di un Mucha” Bolero/Dansa composicion Ramon Krozendijk. E cantante Gisela Trimon despues di basta tempo tabata riba scenario y a brinda e publico cu e cancion “Mañan tin pan den Cas” un wals composicion di Maybeline Arends-Croes. A sigui presentacion di un di nos grandinan cu hopi tabata desea di mire riba scenario Casin Giel cu e cancion “ Nos Celebracion” un wals composita pa su mes persona. E hoben cantante cu un tremendo voz Shannon Bueno a presenta “Stima y yuda Otro”, un balada un composicion di Jane Bueno. Ruth Liliana Gaarie cu tambe ta un cantante conoci a presenta “Bo ta curason di bi Pais” un wals composita pa Casin Giel. E bunita anochi a keda crece y cu presentacion di Hilyann Croes cu a interpreta “Mi mensahe” cual ta un dansa composita pa Jossy Brokke Jr. Otro artista cu a presenta e anochi aki tabata nos gran cantante Edjean Semeleer cu a interpreta e cancion “Recuerdo” un wals composita pa Ramon Krozendijk. Tambe e anochi aki a presenta Rachel Kraaijvanger un cantante cu un excepcional voz cu e cancion “Mi ta kere den Amor” un wals composita pa Erick Rincones. Ghislaine Comenencia tamabe a deleita e publico cu un rock/balada cu e titulo “Dicon” composita pa Gloria Vega. E talentoso artista Cesar Olarte a brinda e publico cu su cancion “Amistad” un balada/funk composita pa Ramon Krozendijk. No por a keda afor e cancion “Mi Pais” cu a wordo interpreta pa Edjean Semeleer y composita pa Roy Olive. E conocido cantante Sasha Figueroa a presenta e cancion “Libertad”, un dansa composita pa Martha Figueroa. Pa sera e anochi a wordo presenta un potpourri mix di cancionnan instrumental acompaña pa nos artistanan. Na final Minister Sra. mr. Xiomara Ruiz-Maduro a pasa saluda y gradici e elenco grandi di nos artistanan personalmente pa nan bunita contribucion na e celebracion exitoso di Dia di Betico.