Parlamentario Endy Croes como presidente di e Comision Fiho di Deporte y Cultura den Parlamento di Aruba a participa dia 25 di januari ultimo den e Betico Race organisa pa IBISA. Dia di Betico, esta nos dia Nacional ta un dia festivo unda tin masha hopi actividad na Aruba banda di e Celebracion Nacional organisa pa Gobierno, tanto e acto protocolar mainta como e celebracion cultural anochi na Plaza Libertador Betico Croes.
Parlamentario Endy Croes kier stimula tur nos conciudadanonan pa practica deporte y asina mantene e curpa sano y den condicion. Segun e Parlamentario desde cu el a drenta Parlamento pa sirbi pueblo, e tempo pa su mes y famia a disminui masha hopi unda consecuentemente su mesun persona a aumenta di peso. Pero desde 25 di januari en adelante e lo percura pa 30 minuut pa dia pa asina por entrena y stimula pueblo pa tambe practica. IBISA a organisa e Betico Race esta di 6 km y 10 km. Parlamentario Endy Croes hunto cu su famia a acudi den e seccion di 6 km y asina stimula alaves e aña proclama como aña di famia. Careda a inicia pa 6 am exacto y tabata sold out cu mil (1000) participante cual ta un exito rotundo. Parlamentarionan Edgard Vrolijk y Setty Christiaans Yarzagaray tambe a participa dunando e conviccion cu e gobierno aki ta para pa salud y deporte.
Palabra di pabien na Gobierno di Aruba y Minister di Deporte sr. Dangui Oduber cu ta sostene IBISA den e proyecto aki. Pabien na tur e ganadornan den 10 km y 6 km y sigur pabien na e miles di hendenan cu a madruga pa inicia e celebracion di dia de Betico na e manera aki. Claro pabien na henter comunidad pa cu e gran celebracion di dia di Betico. Recordando alaves riba su dia Nacional un refran cu nos Libertador Betico Croes semper a usa, esta “ El que madruga Dios lo ayuda”. Parlamentario Endy Croes ta termina bisando cu ohala e por logra cende e mecha den hopi di esnan cu ainda ta duda pa cuminsa train y den 2019 lo bay mir’e hopi activo den e diferente actividadnan asina. Danki alaves na Sportzone Aruba pa e potret.