Diamars ultimo Gobernador di Aruba Sr. Boekhoudt, Secretario di Estado Hulandes Sr. Knops y a recore e facilidadnan na Parkietenbos y Ser’i Teishi y a ricibi un presentacion extenso di ekipo di experto di ministerio di Desaroyo Teritorial, Infrastructura y Medio Ambiente relaciona cu plan di pais Aruba pa locual ta un maneho di desperdicio sostenibel.
Pa Minister Otmar Oduber esaki ta un bishita hopi importante unda e mandatarionan por a mira di cerca e problema mas grandi cu pais Aruba ta biba cune. Minister Oduber, ta gradici Gobernador Boekhoudt cu a mustra interes pa mira un solucion sostenibel pa nos Pais. Secretario di Estado Sr. Knops su interes tambe tabata hopi grandi pa cu esaki. Segun Minister Oduber, Sr. Knops tabata na altura di e pasonan cu Aruba a tuma ya cu su persona ta encarga pa supervisa pasonan similar cu Sint Maarten ta tumando conhuntamente cu ayudo di ‘Worldbank’ pa locual ta nan retonan relaciona cu desperdicio.
Tambe ta conoci cu na Corsou y Boneiro esaki ta un topico di tur dia. Na momento cu tanto Gobernador como Sr. Knops a mira cu Aruba ta canando un proceso pa locual ta un maneho di desperdicio sostenibel serio, extenso y dedica, secretario di Estado Hulandes Knops, tabatin palabranan di elogio pa henter e ekipo despues di a ricibi un presentacion.
Na Parkietenbos a mustra e desaster cu tin y como pais a mustra cu no ta bay continua den e direccion aki. Despues a bay Ser’i Teishi cual ta e proceso cu ta tumando luga awor aki na un forma intermediario mientras cu ta yega na un solucion a largo plaso y duradero.
Durante e presentacion no solamente a elabora riba e aspecto di incinerator pero tambe a mustra con ta bay remedia Parkietenbos y con ta bay implementa un plan integral. Esaki ta hasi e proyecto uno sumamente grandi pa pais Aruba. Minister Oduber a bisa cu e ta contento cu e reaccion cu a ricibi, unda a aplaudi y respeta fuertemente e proceso cu ta canando na e momento aki. Mas ainda a papia con por coopera y yuda otro. No a papia solamente riba ayudo sino colaboracionan cu lo tin balor agrega pa tur partner den Reino. Asina a enfatisa cu e problema di desperdicio ta uno cu ta afecta Reino Hulandes den su totalidad. Minister Oduber ta indica cu solamente trahando hunto tur partner den Reino lo yega na e meta di crea un futuro sostenibel.