ORANJESTAD – Durante e conferencia di prensa di e siman aki Minister di Finansa, Asuntonan Economico y Cultura a splica e motibonan dicon Gobierno a dicidi di sigui duna e ‘Reparatie toeslag’.
Minister Sra. mr. Xiomara Ruiz-Maduro a splica for di tempo cu a bin cu e Ley y pa ken inicialmente e Ley tabata. Na aña 2010 a introduci e ‘Reparatietoeslag’; e tempo ey el a ser introduci pa e trahadornan cu tin un salario maximo di Afl 2.500,= pa luna pa nan por a ricibi e beneficio aki. Na momento cu a introduci e Ley a dicidi pa inclui e pensionadonan como un grupo apart. Na 2013 a bini cu un cambio y a hisa e montante di 50 florin pa 100 florin. Ta bon pa menciona cu den e Ley aki tin un ‘inkomenstoets’; esey ta nifica cu ta depende di bo salario cu lo bo ricibi ‘Reparatietoeslag’ ; cu na 2013 originalmente a ser inclui pa tur hende. Pero durante tratamento di e Ley aki, el a ser cambia y e grupo di pensionadonan a keda apart, sin e ‘inkomenstoets’.
Aña pasa na momento cu a bini cu e ‘Crisisheffing’, nos Gobierno a duna un compensacion extra di 25 florin. Na e momento ey, nos Gobierno a informa cu den e Reforma Fiscal e pensionadonan lo ricibi mas beneficio, cualnan ta:
- un aumento di 25 florin di SVB pa esnan soltero y 42 florin pa esnan casa.
- banda di esaki lo baha e prima di AZV di 10.5% pa 6.5%.
- alavez door di implementacion di e ‘belastingvrije voet di loon y inkomstenbelasting’ ta pone cu un cantidad grandi di pensionado lo bay paga menos belasting of no lo tin cu paga belasting mes.
Pues e grupo di pensionado lo bay hopi dilanti cu e cambionan di Reforma Fiscal. Teniendo na cuenta situacion financiero di nos Pais Aruba y cu ya caba e pensionadonan ta bay wordo beneficia; e decision a wordo tuma e tempo ey den e Ley cu a pasa den Parlamento, pa duna e 125 florin na solamente e pensionadonan cu mas mester di dje. Esta den e espirito di e Ley manera e mester a wordo inicia.
Na momento pa aplica e cambio di e Ley, esaki a trece su retonan administrativo. E Ley di ‘Reparatietoeslag’ in principio, mester ta pa esnan cu tin mas mester di dje. Pero e realidad ta cu no tin un registracion adecua, pa por controla esaki. Den nos registracion actual no por saca completamente afor, cual pensionado ta ricibi SVB so, cual pensionado ta traha banda di ricibi un pension di SVB y/ of ta haña mas pensioen y cual montante esaki ta. Ta bon pa menciona cu den e grupo di pensionado tin tambe pensionado cu ta cobra por ehempel 5000 of 6000 florin pa luna, cual tambe lo bay ricibi e 125 florin.
Pa no bay perhudica e pensionadonan cu tin un pension chiquito, cual netamente ‘Reparatietoeslag’ aki ta pa nan, nos Gobierno como un Gobierno responsabel mester a tuma e decision pa di continua cu e ‘Reparatietoeslag’ di 125 florin.
Gobierno a ser conseha tambe pa bin cu un ‘sliding scale’; esta pa duna solamente esnan cu mas mester e ‘Reparatietoeslag’ y no duna esnan cu un pensioen mas halto; pero Gobierno a ser recomenda pa no haci esaki, ya cu ta discrimina e grupo di pensionado.
Ta bon pa menciona cu na ningun momento nos Gobierno a haci ningun eror. For di momento cu a introduci e Ley aki na 2010 tabata sa cu elo bay trece problema. Como un Gobierno responsabel y pa motibo administrativo y pa no crea un discrepancia y discriminacion denter di e grupo di pensionado, Gobierno a dicidi pa sigui paga e ‘Reparatie toeslag’ na tur pensionado.