Siman pasa diamars 15 di januari Minister Dangui Oduber hunto cu director di AZV Ruben Goedhoop a launch e app di AZV pa midi e servicio di dokternan di cas. E proyecto aki a cuminsa varios luna pasa y porfin e dia a yega cu comunidad por download e APP y haci uzo di esaki pa duna un rating/score na e experiencia cu e asegurado ta ricibi for di su dokter di cas. E app di AZV aki ta algo innovativo y sigur algo nobo cu nunca antes a wordo introduci na Aruba. E intencion di e app aki ta pa haci e dokternan di cas consciente di e servicio cu nan ta brinda na comunidad. Como minister responsabel pa salud publico ta un exigencia dimi pa tur esnan cu ta traha den cuido duna e miho servicio na nos hendenan. Nos kier pa mehora e cuido y mehora e servicio y e app aki sigur lo yuda nos den esaki. Nos ta desea pa comunidad haci bon uzo di e app pa asina nos haya datos y cifra riba e servicio di dokternan di cas. Di e manera aki nos lo haya tur informacion necesario cua ta dokternan di cas cu ta brinda un bon servicio y cua ta e dokternan di cas cu mester mehora y drecha nan servicio. Nos ta biba den un comunidad chikito y tin hopi presion di comunidad pa mehora e servicio. Nos ta scucha comunidad y nos ta tuma accion y e decisionnan corecto pa drecha y mehora nos cuido medico.
E app aki ta un di e tantisimo decisionnan cu nos a tuma caba pa asina mehora servicio y cuido medico na Aruba. Nos ta trahando riba e wachttijden na spoedeisende hulp. Management di Hospitaal y tambe di AZV ta bon na altura di e posicion di minister caminda minister ta desea pa reduci e wachttijden na spoedeisende hulp. Banda di esaki nos trahando riba e wachtlijsten nan tambe na momento un asegurado mester haya un verwijzing di un huisarts pa un specialista. Nos a pone como meta pa reduci e doorlooptijd y asina baha e lista largo di espera.
Nos ta den e proceso pa finaliza e Arubig pa asina hacie posibiel pa un studiante cu specialisa den region por bin traha bek na Aruba y wordo registra den nos Arubig. Tambe nos ta enfoca riba prevencion. Pa promer biaha ta pone asina hopi atencion den un plan nacional di prevencion cu sigiur lo duna resultado.
Despues di decadanan nos lo revisa e ley anticua di AZV y adapta esaki caminda ta necesario.
Hopi decisionnan a wordo tuma pa mehora nos cuido y minister ta convenci cu trahando hunto cu AZV, HOH, IMSAN, HAVA, ASHA y tur otro stakeholder lo sa di mehora nos cuido.
Minister Dangui Oduber ta haci un yamada na comunidad pa download e app di AZV via google play store of via e app store. Por search e app aki como AZV Healthcare Provider Rating.