Siman cu a pasa, Parlamento di Aruba a participa na e reunionnan Interparlamentario di Reino na Sint Maarten, IPKO. Parlamentario Setty Christiaans-Yarzagaray a elabora riba su participacion na e gruponan di trabou durante e reunionnan aki. Parlamentario Christiaans-Yarzagaray a participa den e grupo di trabou cu ta trata e Metanan di Desaroyo Sostenibel, SDGs cu tambe ta forma parti di e agenda di IPKO y lo keda tambe den e proximo reunionnan mirando e echo cu Aruba, Corsou, Sint Maarten y Hulanda lo mester raporta hunto tocante e Metanan di Desaroyo Sostenibel na Nacionnan Uni (UN) periodicamente.
Manera a wordo palabra den reunionnan anterior di IPKO, a parti e gruponan den gruponan di trabou. Grupo di trabou di SDGs a wordo parti den dos, cu ta e dos pilarnan di SDGs, ‘People’ & ‘Peace” y ‘Planet’ & ‘Prosperity’. E grupo di People & Peace ta wordo presidi door di Parlamentario di Corsou, Ana-Maria Pauletta y Planet & Prosperity ta wordo presidi door di André Bosman di Hulanda. Parlamentario Christiaans-Yarzagaray a elabora riba e ‘update’ cu tawatin riba ambos grupo mirando cu el a forma parti di tur dos grupo.
Pa loke ta trata e pilar di SDG People, a dicidi cu Parlamento lo pone mas atencion riba e mehoracion di coleccion di data y indicadornan. Pa e Parlamentario a resalta cu apesar cu nos ta un isla, no ta nos so ta limita na informacionnan necesario pa yega na e indicadornan pa midi ki ora of si nos ta cumpli cu e metanan stipula pa Nacionnan Uni. Hulanda como un pais grandi tambe a remarca e necesidad pa informacion y a wordo dicidi cu conhuntamente lo bay traha riba e punto aki. Pa loke ta trata indicadornan, a keda palabra entre e Parlamentonan cu lo bay sigui di cerca con ta yega na esakinan mas eficiente posibel.
A dicidi den e grupo di People cu lo pone enfasis riba eradica pobresa bou cual puntonan di atencion tambe lo ta riba coleccion di data, concorda riba indicadornan y extra atencion lo wordo dedica tambe riba igualdad di genero (gender equality). En especial atencion lo wordo dirigi riba igualdad di hende muher den sentido di oportunidad igual den area laboral pero tambe ora e hende muher ta cay den un grupo vulnerabel (p.e. mama soltero) of cu limitacion. Sinembargo, lo no perde for di bista otro gruponan vulnerabel den comunidad, manera nos grandinan y esnan cu limitacion.
Pa loke ta trata e otro grupo di trabou, Planet & Prosperity, durante e reunionnan di IPKO, a pone enfasis riba cambio climatico unda como puntonan di atencion lo wordo poni riba entre otro, reduccion di CO2, carbon footprints, maneho di desperdicio riba nivel macro, meso y micro y tambe conscientisacion di e pueblo riba e topiconan aki.
E Parlamentario a duna di conoce cu a pone hopi enfasis riba e discusionnan di maneho di desperdicio. Aki na Aruba tambe, maneho di desperdicio ta hopi necesario y ta hayando su atencion debido. Ademas di e dos gruponan aki di trabou, tambe tin e grupo di trabou riba Integridad cu ta wordo presidi door di Rocco Tjon. Pa cu e grupo di trabou aki Parlamentario Christiaans-Yarzagaray conhuntamente cu Parlamentario di Tweede Kamer di Hulanda, sr. C. van Dam, a logra pa e pilar di SDG ‘Peace’ haya su atencion debido y su contenido den e grupo di trabou aki. Motibo di e proposicion di e Parlamentario pa e cambio aki ta e echo cu e pilar di ‘Peace’ di SDG ta pa logra meta nr. 16 di SDGs cu ta pa promove paz pero tambe traha riba e parti pa tin acceso na husticia pa tur hende y e meta aki ta trata principionan di bon gobernacion, responsabilisacion y transparencia den institutonan.