For di fin di 2009 Aruba a conoce un maneho financiero cu a wordo usa pa paga pa e “sprookjes” di Mike Eman cs.(AVPOR). Asina nos mester a tende cu na 2020 Aruba lo ta 100% Green y cu esaki lo nifica cu Aruba lo bai conoce un crecemento economico. E “sprookje” aki manera nos tur sa a hiba nos pueblo na rand di un bancarota sin cu nos a conoce un crecemento economico significante. E “sprookjes” aki a ser financia dor di endueda nos pais descaradamente. Pa colmo cu hopi orguyo y a aumenta e quota di debe di 42% te na 93%.
Tur hende cu sano huicio mester por sa cu un debe asina simpelmente no ta sostenibel.
Caft a conseha caba cu MESTER bai baha e debe aki un manera of otro. Ta abase di esaki nos pueblo a worde hiba pa e altar di sacrificio.
Ora cu nos a kere cu nos gobernantenan a haya screment y cu lo stop cu mas enduedamento, nos ta ripara cu esaki absolutamente no ta e caso. Al contrario. Ta sigui endueda nos pueblo cu e.o. leasemento, huurmento di edificio di sponsornan, contractonan fabuloso etc etc.
Ora nos a kere cu e epoca di “sprookjes” a desaparece hunto cu Mike Eman, ata su dicipulo mayor, Otmar a aparece cu e locura di “Waste to Energy via mass inceniration”.
Esaki no ta nada otro cu e desperdicio cu awor ta wordo deposita na un manera iresponsabel den e landfill na Sero Teishi, lo wordo kima den un forno (incenirator) cu ta wordo converti den energia. E supuesto “logro aki ta wordo bendi como e.o. algo super “GREEN” y un rebaho di e prijs di awa y coriente.
E “sprookje” aki no ta nada nobo. Den pasado caba, cu tabata den rood formal, a negosha y a yega na un acuerdo pa e planta di Ecogas. E tempo ey caba nos a tende cu esaki ta e “wondermiddel” y cu lo ta e solucion. Y esaki lo baha e prijs di awa y coriente tambe.
Un fracaso total y un otro engaño. Loke si a sosode ta cu e Pueblo di Aruba mester a paga mas di 20 miyon pa e tuberia y adaptacionnan den WEB, sin cu ni un mili-liter di gas a pasa den e tuberianan aki. Straño ta cu ningun hende ta puntra con a para cu esaki? Dicon? Miedo di kico of di ken tin? Nos parlamentarionan “critico” y “otro” riba esaki ta keto.
Remarcabel ta cu ta mesun asina yama “expertonan” di WEB e tempo ey a negosha y acorda henter e proyecto aki cu Ecogas, awe mester constata cu ta nan mes ta conseha e gobierno actual ( POREDmep) al respecto. Dicon awor si nan conseho lo ta bon? Of ta pasobra cu un di nan ta ruman di e minister, awor si nan lo ta bon? Unda nos parlamentarionan a keda? Miedo di cuestiona atrobe?
Nos kier ta hopi cla den esaki, mester bin un solucion mas pronto cu ta posibel pa e problema aki, sigur despues cu e gobierno AVPOR a boycotea e proyecto di WasteAway di Bouldin & Lawson, cu tabata e solucion cu MEP a laga tras cu a costa 28 miyon florin SIN ENDUEDA nos pueblo!!!
Despues cu 1 di mei 2002 pueblo di Parkietenbos y di Aruba a wordo alivia di e huma di dump ora cu a stop e kimamento di sushi na Parkietenbos. A haci esaki un “sanitary landfill” conforme reglanan internacional. Esaki como un fase transitorio. Despues di un procedura realmente transparente, bow guia di AIB y FDA y gobierno(e.o. cu sr. Patricio Nicolas na cabes y cu e minister a elogia fin di aña), na 2009 Aruba a conoce un solucion pa e problema di desperdicio cu e ponemento den operacion di e asina yama “WasteAway” di Bouldin & Lawson. Atrobe SIN cu mester a endueda nos pais. Lamentablemente e gobierno di AVPOR a boycotea esaki na ordo y asina ey e pueblo di Parkietenbos un biaha mas a conoce e molester e.o. di huma, musca y sangura.
Ta conoci cu tin solucionnan factibel, pagabel y sostenibel available y cu lo no bai hinca Aruba den debenan astronomico cu lo bai hisa e quota di debe na por lo menos 125%!!!!
Segun e documento cu nos ta dispone di dje y cu nos sa cu sr. Rocco Tjon tambe tin, minister Otmar a pidi Bouldin & Lawson pa hasi un evaluacion ( cu a costa 16 mil dolar) pa instalacion cu tey caba y nan a presenta un solucion factibel, pagabel y sostenibel cu ta hasi posibel cu e planta lo por opera atrobe mescos cu ela opera prome cu e boycot feroz di e gobierno AVPOR. Y e bon di esaki ta cu pa pone e planta draai atrobe esaki lo bai costa menos di 5miyon florin, cual por ser considera “chickenfeed” si compare cu e “SPROOKJE ” di WTE cu lo bai costa total por lo menos 720 miyon florin.
Sinembargo kico e minister aki ta haci? E ta laga su “conseheronan” y su “expertonan” di WEB hunto cu TNO traha un raport na unda e.o. ta ser bisa cu e planta di B&L no ta sirbi y cu nunca a funciona. Di e forma aki ignora e mas di 7 sentencianan di Corte cu ta bisa tur lo contrario y cu ta un BOYCOT feroz di e gobierno AVPOR ta e causa cu e planta no a funcciona ni ta den funccion awor.
Y e hecho cu a scohe pa sconde tras un raport mediocre y yena cu mentiranan pa sigui cu e boycot cu a inicia tempo cu Otmar orguyosamente tabata forma parti di e gobierno maligno di AVPOR. Lamentablemente e mesun dicipulo mayor di Mike Eman ta haya sosten di e fraccion di MEP, cu awor ta “doe mee” cu e boycot y laga un proyecto di MEP cai djis pa miedo pa gobierno bai cas. Cu e drechamento di e “WasteAway-plant” e pueblo di Parkietenbos lo a wordo alivia y esaki ta un hecho y no un “sprookje” y esaki sin ENDUEDA nos pueblo mas ainda!!!
Cu nos mester percura pa nos laga nos planeta pa e proximo generacionnan por biba sanamento nos tur ta di acuerdo cu esey. Pero cu nos mester bai haci esaki djis pa complace cu e mafianan di medio ambiente cu kier pretende cu “WTE via Mass Inceniration” ta e solucion, ta inaceptabel. Nos lo bai mustra den un proximo articulo cu ehempelnan recien cu esaki ta simpelmente un mentira flagrante. Manera ta ser bisa, dor di e expertonan cu no tin instalacion pa bende, pero si ta expertonan cu por scrutina y desbarata tur e “sprookjes-verhalen” aki: BURNING WASTE IS…..WASTEFUL!!
Aruba, 13 januari 2019
Booshi Wever
Lider UPP
Brazil 163