Alto Vista: Aruba a cera aña 2018 cu un tremendo show di Vuurwerk, pero manera tur aña ta e caso, cu nos mascotanan especialmente cachonan no por cu e sonido fuerte, nan ta haya hopi miedo y tin te hasta ta huy for di cas.
Despues di dia 1 di Januari por a bolbe mira algun cacho cu a yega den e area di kapel di Alto Vista, segun nos a compronde di un persona cu ta tur dia eybanda, cu e cachonan aki ta cana rond den e mondi y tin cu no tin miedo di hende, ta bay te den e kapel. Nan ta pasa bringa cu otro y tin un di e cachonan tin basta herida na su curpa.
Segun esnan cu ta bende raspao nan lo a pone autoridad caba na altura di esaki pa asina mira si un instancia por bin busca e cachonan aki. Nan no ta cacho maltrata, nan ta mustra cachonan bon cuida.
Na e sitio nos a topa cu un cacho macho, geel cu boca preto drumi den porta di e kapel tambe den e mondi bandi pazuid caminda cu aparentemente lo mester tin mas cacho, nos a mira un bruin cu strepi scur parce un style di cuero di tiger.
Spanto por a pone nan core bay basta leu di cas y a perde caminda di cas y nan no por bay nan cas bek. Si bo a perde bo mascota tira un bista den e area aki pa mira si un di e cachonan aki por ta di bo y tambe lo ta bon pa un instancia bay eybanda piki e cachonan aki.
