ORANJESTAD – Durante e conferencia di prensa semanal di partido AVP Parlamentario mr. Drs. Richard Arends un biaha mas e trece e realidad tras di e Reforma Fiscal, introduci den su prome fase dia 1 di januari ultimo. “Nos a ricibi hopi yamada y a papia cu varios comerciante, kendenan a vocifera nan preocupacion pa loke ta trata e mal introduccion di e prome fase di e Reforma Fiscal y e incertidumbre cu nan ta aden”
El a mustra riba datonan cu a wordo treci dilanti durante tratamento di presupuesto 2019 y e ley di Reforma Fiscal den luna di december. Mientras cu Gobierno a bisa cu tur hende ta bay dilanti den nan entrada, comunidad mester carga un peso 270 miyon florin. E cifranan ta mustra cu e “alivio” cu comunidad ta bay sinti ta costa Gobierno solamente 16 miyon florin.
“Tur hende cu por haci un comparacion ta mira un aumento di 270 miyon florin no ta den proporcion cu un compensacion di 16 miyon cu ta wordo duna. Contrario na loke cu Gobierno ta propaganda, un y tur por saca nan conclusion cu ningun hende ta bay dilanti cu e prome fase aki di e Reforma Fiscal aki.” Ambtenaarnan lo ricibi un compensacion adicional manera palabra den e protocol di 2014 di Dialogo Social, pero esaki ainda no ta ni yega cerca di e peso cu mester carga.
Arends a splica cu fraccion di AVP a vota contra e Reforma Fiscal na prome luga pa motibo cu tur hende ta bay atras y no tin compensacion real pa e perdida di poder di compra. Personanan cu a inverti den nan propiedad ta wordo castiga. Empresanan chikito y mediano tampoco ta ricibi e incentivonan necesario. “E maneho fiscal di Gobierno ta inconsistente: seis luna atras Gobierno tabata kier pa tur hende wak ki belasting ta wordo cobra y a hasta laga politica drenta den un area netamente administrativo. Awe ta prohibi comerciante di mustra esaki den nan producto of servicio.
“Cu tur e inconsistencianan aki tin un falta total di proteccion di e consumidor cu ta wordo exponi na speculacion y incertidumbre di loke nan ta paga na comestibelnan,” Parlamentario Arends a splica.