Desde comienso di gobernacion, Gabinete Wever-Croes a dicidi di pone e ser humano central den e gobernacion aki pa asina cambia e enfoke di e desicionnan di Gobierno y pone mas enfasis riba cada persona cu ta biba riba nos isla. Durante aña 2018, Gobierno a pone hopi enfasis riba e Crisis Plan Social pa e problemanan mas urgente den nos comunidad haya atencion mas urgente posibel.
Prome Minister Evelyn Wever-Croes a anuncia cu den 2019, Gabinete Wever-Croes lo consolida tur esfuersonan haci den e Crisis Plan Social y a declara 2019 como Aña di Famia y Cuido di nos Muchanan.
E mandatario principal di nos pais a duna di conoce cu durante ultimo añanan, e enfoke tawata riba desaroyo economico di nos pais, desaroyo financiero di nos pais, desaroyo energetico di nos pais. Por bisa cu berdad nos pais a progresa den cierto aspectonan. Sinembargo, manera e dicho ta bisa, ‘No ta tur cos cu ta briya ta oro’. Y a wordo demostra cu e ser humano, famianan y muchanan, a wordo neglisha.
Desde aña pasa, Gabinete Wever-Croes ta informa tocante e Cambio Husto na unda lo haci e reparticion husto pa loke ta trata impuesto cu e meta pa ciudadanonan tin mas placa den nan cartera na fin di luna. Gabinete Wever-Croes ta considera esaki como un aña di recuperacion. Recuperacion financiero y economico y mas importante ainda, e recuperacion y restauracion di e aspecto humano, e aspecto familiar.
Prome Minister a enfatisa cu pa aña 2019, Gabinete Wever-Croes su meta ta pa fortifica e fundeshi familiar y e balornan universal y alabes ta haci e base entre famianan, amistadnan y colegialidad mas fuerte. Pa logra esaki, cada ministerio di Gabinete Wever-Croes lo enfoca riba loke ta trata su area pa fortifica e fundeshi di famianan na Aruba. Den esaki, lo inspira y conscientisa pueblo riba tur locual ta wordo haci pa fortifica lasonan familiar. E resultado di esaki lo ta cu cada famia lo bira un ekipo cu por enfrenta e retonan cu cada famia lo enfrenta. Un fundeshi solido di un famia solido por yuda nos generacionnan bira exitoso den bida.
“Notable ta cu Gobierno ta haci hopi di su parti, y lo sigui haci hopi cuminsando tambe cu e suma di 32 miyon florin cu ta wordo hinca den e Crisis Plan Social. Y tambe Gobierno kier pa e responsabilidad wordo comparti den e seno familiar. Den e plan aki lo envolve y fortifica e centronan di barrio cu mas actividadnan, mas asistencia social den tur bario. Leynan lo wordo revisa tambe pa mira unda mester duna mas fortificacion na famianan pa asina nos por crea un Aruba cu famianan fuerte. Na final di 2019, nos por mira cu e Aña di Famia y di Cuido di nos Muchanan a duna resultado concreto. Den e siguiente simannan, tur ministerio lo duna mas informacion riba e tema aki”, Prome Minister Evelyn Wever-Croes a expresa.