Desde cu e gobierno anterior a introduci sticker y lagando e mesun plachi di number di aña 2015, a bira mas dificil pa cuerpo policial haci nan trabou pa controla vehiculonan. Cu e introduccion di sticker, a nota tambe, segun e Departamento concerni, falsificacionnan tanto di e sticker mes como tambe di e plachi di number mes. Pa Cuerpo di Polis, esaki ta algo cu a bira un problema y ta haci nan trabou di controla mas dificil. Un otro problema tambe cu a surgi cu e cambio aki ta cu a constata cu e percentahe di automobilistanan cu no a cumpli cu nan deber pa paga, a aumenta.
Esaki tawata un cambio cu e Gobierno anterior a haci sin un hustificacion valido y no tawata tin niun beneficio pa nos pueblo sino mas bien a haci trabou tanto di e Departamento di Impuesto como di Polis mas dificil. Pa cua motibo tambe, Gobierno a tuma e decision pa draai e cambio haci aki bek.
Recientemente, Vocero di Polis, señor Lito Lacle, den un entrevista a expresa di ta sumamente contento y satisfecho cu e decision di Gobierno pa bin bek cu plachi di number di auto.
E proceso pa haya plachi di number, ta cuminsa cu paga seguro di auto prome y entrega e prueba di pago pa por haya e plachi di number. Ta importante pa tin bo seguro na ordo pasobra no solamente esaki ta haci e trabou di Polis mas facil, pero tambe ta duna mas proteccion na ciudadanonan cu por haya nan envolvi den un accidente di auto contra un auto cu no ta sigura.
Plachi di number di auto ta haci e trabou di Polis mas facil como tin mas visibilidad y asina Polis por controla miho tambe kende a paga of a keda sin paga. Pa e motibo aki tambe, Cuerpo Policial di Aruba ta sumamento satisfecho cu e decision di Gobierno pa bin bek na e sistema bieuw y trece bek plachi di number.
Pa Gobierno di Aruba, esaki tawata un cambio cu sigur mester a haya atencion y awo na 2019 esaki ta wordo realisa y ta bin bek cu plachi di number di auto y sticker ta wordo elima. Sigur nos pueblo ta cuminsa sinti ordo bek den nos comunidad.