Oranjestad – Oficina di Turismo ta contento pa comparti cu desde dia 22 di december, Aruba a expande su mercado cu vuelo directo y semanal cu dos ruta nobo di Dallas (Texas) pa Aruba y di Chicago (Illinois) pa Aruba.
Trabou den ekipo cu Aruba Tourism Authority hunto cu Ministerio di Turismo y Ministerio di Transporte, ekipo di Aruba Airport Authority, Directie Luchtvaart y AHATA ta keda instrumental pa cu e logro di e vuelonan directo cu a inicia diasabra ultimo. Esaki, consecuentemente ta expande e mercado den e area di ‘Mid-West’ di Merca, cu conexion directo for di e area aki pa nos isla pero tambe pa esnan di e parti Oeste di Merca cu ta desea pa bishita Aruba.
American Airlines ta un socio importante pa Aruba. Pa mas di 45 aña American Airlines a contribui na desaroyo di Aruba su turismo, transportando turistanan pa nos dushi isla. American Airlines a conoce den trancurso di añanan un crecemento consistente pa cu e Mercado di Merca y mester menciona cu e ta na es momento aki e di dos socio aereo mas importante pa loke ta trata capacidad di asiento aereo for di e Mercado Mericano. Den e relacion di 45 aña, ta remarcabel cu tabatin momento unda cu American Airlines tabata e unico cu tabata ofrece “scheduled air service” for di Merca y cu e aerolinea ta un socio stabil cu tey den temponan bon, pero tambe ora cu retonan grandi tabata presente. American Airlines ta contectando Merca y Aruba y sigur ta un socio clave cu actualmente ta domina e ruta (y mercado) di entre otro Miami, Charlotte y Philadelphia. For di januari pa cu october 2018 American Airlines a trece un total di 133.518 bishitante pa Aruba, esaki ta 21.7% di total di bishitante pa Aruba, y ta un crecemento di 16.7% compara cu 2017.
Numbernan ta importante y ta yuda nos pone resultadonan den perspectiva, pero e vuelonan adicional aki ta pasonan clave den e strategia di reforsa nos mercadonan fuerte y diversificacion di nos mercadonan turistico.
Den caso di e ruta di Chicago e vuelo inaugural ta permiti Aruba sigui crece den e di 5 mercado mas importante den Merca. Pa loke ta trate e ruta nobo di Dallas e vuelo aki ta cuadra hopi bon cu esfuersonan pa diversifica den e Mercado di Merca, den e caso aki atrayendo mas bishitante for di e parti Oeste, cu lo permiti Aruba captura bishitantenan nobo di perfilnan sumamente atractivo.
E region Oeste a mira un crecemento di 6% for di januari te cu october e aña aki. Entro otro a base di e vuelonan cu a introduce diasabra ultimo, ta projecta un crecemento den 2019 di 10%.
Aruba Tourism Authority kier a gradici na tur esnan cu a colabora pa cu e logro di e rutanan aki cu sigur tawata un trabou den ekipo cu ta conduci na progreso pa Aruba.