Corte di Auditoria a publica su rapport encuanto e preparacion pa realisa e Obhetivonan di Desaroyo Sostenibel, mihor conoci como Sustainable Development Goals (SDGs). A haci investigacion pa haya informacion con leu gobierno di Aruba ta den su preparacion pa por realisa e SDGs. E rapport ta duna informacion tocante e pasonan cu gobierno a tuma te cu awo, como tambe e puntonan di atencion pa por crea un base solido y duradero pa por realisa e SDGs.
Gobierno di Aruba -como parti di Reino Hulandes- a compromete su mes pa realisa e agenda di e SDGs. E investigacion ta indica cu gobierno ya caba a tuma algun paso concreto den su preparacion pa por realisa e SDGs. Asina por constata cu e programa di gobernacion ta contene e principionan di SDGs. Tambe a institui un comision cu lo duna, entre otro un direcion strategico na e proceso, como tambe lo coordina e implementacion. Ademas, gobierno a forma otro gruponan di trabou cu lo haci algun trabou specifico pa duna respaldo na e comision di SDGs. Aunke esaki ta un bon comienso, e no ta suficiente. Gobierno mester pone atencion na algun punto pa por garantisa un base solido y un realisacion duradero di e SDGs. Pa di prome, ta importante pa tin un plan strategico riba nivel nacional, unda lo atende tur e cinco pilarnan di e desaroyo duradero y lo otorga e responsabilidad pa esaki na cada minister. Actualmente no tur minister ta envolvi den e fase preparatorio. Esaki tin como consecuencia cu nan intencionnan di maneho no ta directamente conecta cu realisacion di e SDGs. Tambe no ta tur minister ta na altura di e desaroyonan relaciona cu implementacion di e SDGs. Corte di Auditoria ta conseha pa otorga responsabilidad na cada minister den e fase actual aki y pa percura cu e intencionnan di maneho ta similar, p’asina por realisa e obhetivonan.
Ademas e investigacion ta mustra cu ainda no tin acuerdonan concreto y tampoco proceduranan, pa loke ta trata comunicacion entre e comision, ministernan y Parlamento, riba progreso di implementacion di e SDGs. Tampoco tin nada concreto con gobierno lo monitor y midi e resultadonan di e progreso di e SDG-agenda. Den e rapport di Corte di Auditoria ta describi e resultadonan pa cada ministerio na un manera cla y transparente.
Corte di Auditoria lo presenta resultado di e investigacion ariba diabierna, 14 di december 2018, pa 5or di atardi na MFA Paradera. Sr. drs. Gijs de Vries, ex-miembro di Rekenkamer Europeo tambe lo ta presente pa comparti su conocemento y experiencia riba implementacion di SDGs mundialmente y tambe pa comparti e vision di otro Rekenkamers. Corte di Auditoria ta invita un y tur pa por ta presente e anochi ey.
E version digital di e rapport di Corte di Auditoria ta obtenibel via www.rekenkamer.aw