Un sin fin di reaccion sumamente negativo a surgi for di skina di AVP despues cu Gabinete Wever-Croes e siman ultimo a anuncia implementacion di e prome fase pa loke ta e Reforma Fiscal di nos pais. Un hala di politico frustra y envidioso (Mike Eman, Richard Arends, Mervin Wyatt Ras, Jennifer Arends Reyes, Melvin Tromp, Arthur Dowers), kendenan tur durante 8 aña di gobernacion di AVP no tabatin e curashi ni e capacidad pa percura pa un cambio den e sistema fiscal anticua cu nos pais a conoce pa decadanan largo, a baha manera zamuro riba e asunto di Reforma fiscal nobo. Cu esaki tambe a keda demostra cu AVP ta contra pa reduci e tarifa di impuesto directo y consecuentemente contra pa e clase trahador haya extra placa den nan cartera. Nos tur por corda ainda con e ex-Minister di Finansa Bermudez na 2016 a haci un movecion den e direccion aki y kier a introduci un Algemene Bestedings Belasting (ABB) pero finalmente el a wordo prohibi door di Mike Eman pa sigui cu esaki y cu te hasta a yega asina leu cu Mike Eman a pone un bosal na su boca pa e no papia mas riba e topico aki.
Vision y curashi
Hecho ta cu e unico gobierno cu desde Status Aparte tabatin e vision y curashi pa percura pa comienso di un cambio total di impuesto directo pa impuesto indirecto tabata Gabinete Oduber na 2007. Hopi politico di AVP tur dia ta come y lubida, pero cu implementacion di e impuesto indirecto BBO, un rebaho substancial a ser realisa den e tarifanan di loon (inkomsten) belasting y cu finalmente a conduci cu tur trahado a keda cu mas placa den nan cartera. Esaki ta un logro cu ningun otro partido politico por kita for di MEP. Te hasta partido AVP cu den campaña pa eleccion 2009 a priminti sagradamente di kita e BBO, a mantene y brasa esaki y durante 8 aña nan a djo djo cu tur e sumannan miyonario ricibi di e impuesto indirecto aki. Pero nunca den e 8 añanan aki nan pa percura pa sikiera baha un tiki e tarifa di loon (inkomsten) belasting!
Abismo financiero pa culpa di Mike Eman
Y awe cu partido MEP conhuntamente cu partidonan di coalicion POR y RED kier sigui cu e maneho pa reduci e tarifanan di loon (inkomsten) belasting entrante 2019, tur e politiconan rencoroso di AVP ta sapatia gritando manera alma malo cu e ‘Reforma fiscal ta un triki’, ‘Reforma fiscal ta un simpel aumento di impuesto’ etc. Te hasta e destructor di nos finansa publico y economia, esta Mike Eman tin e curashi pa declara cu ‘Maneho di gobierno ta sigui pusha pueblo den abismo financiero’. Mira kende ta papia di abismo financiero! Un Mike Eman cu durante su mal gobernacion a percura pa deficitnan nunca bisto den historia di nos pais, caminda nos a conoce recordnan di deficit di 443 miyon florin na 2012 y 405 miyon na 2014. Ora Mike Eman ta papia di abismo financiero e mester tin berguensa di bisa esaki, ya cu ta su persona y gobierno a haya un Aanwijzing, KB y Caft den su scochi na momento cu Hulanda a realisa cu Mike Eman tabata hibando nos pais na un derumbe total di nos finansa publico cu un averahe di deficit di 274 miyon florin pa aña. Ora Mike Eman ta papia di e supuesto crecemento economico di 2.3% na 2017, e mester tin berguensa di menciona esey tambe, ya cu e crecemento economico aki tabata incidental cu a ser crea por medio di e debe nacional gigantesco y biyonario cu su gobierno a haci y tambe tur e debenan extra cu el a crea cu e proyectonan PPP. No ta un arte pa goberna un pais di forma aki.
Finalmente partido MEP ta haci un apelacion na tur e politiconan di AVP pa nan samina nan consenshi, recapacita, realisa e daño grandi cu nan a haci durante 8 aña contra nos pais y bin para banda di esnan cu kier bon pa e pais aki y cu ta trahando dia y anochi pa pone nos pais riba e rumbo di progreso atrobe. After all, lo bay dura te cu aña 2039 pa nos pais bolbe na un debe relata na GDP di 50% cu Gabinete Oduber a laga atras na 2009. Y partido AVP tambe ta responsabel pa yega na e meta financiero aki. Si bo no kier yuda, no stroba y para un banda y wak con otronan ta salba e pais aki.