10 di december ta dia Internacional di Derecho Humano. Ta setenta aña pasa cu Asamblea General di Nacionnan Uni a adopta e Declaracion Universal di Derecho Humano. En conexion cu e dia aki, Minister di Asunto Social y Labor ta reiteira su compromiso den su afan continuo den mehora e calidad di bida y existencia di nos conciudadanonan y enfoca riba e importancia di e derechonan cu cada un di nos tin. Esaki ta e filosofia di Gabinete Wever Croes unda cu e ser humano ta semper central den tur su decisionnan. Den e cartera di Asunto Social y Labor, a aspecto humano ta cardinal den e maneho di e mandatario.
Pa Minister Glenbert Croes e derecho di e ser humano cu ta traha diariamente pa hiba su mes, su famia y su pais dilanti, ta central. E derecho humano di siguridad laboral y fisico ta pa Gobierno di Aruba, central. Pa e ser humano cu circumstancia ta impidie labora, nan derecho ta pa nos central. E ser humano di mas chikito nan proteccion ta pa nos central. Den Ministerio di Asunto Social y labor, e liña cora den e maneho diario ta e derecho sagrado di tur ser humano sin excepcion algun.
Den entrada di un aña nobo, Gabinete Wever Croes a anuncia un reforma fiscal unda cu tur trahador, tur famia, tur grandi ta wordo beneficia. E ahustacion den salario minimo cu ta bay na vigor 1 di januari 2019 den combinacion cu e reforma fiscal, ta un alivio mientras cu Minister Glenbert Croes ta continua den e lucha di por aumenta salario minimo den bon consulta cu tur gremionan na Aruba.
Un biaha mas si e yamada di e mandatario: “ami ta lucha pa bo. Abo tambe lucha pa bo mes, pa bo trabou, pa bo famia y pa bo pais por tin un miho porvenir. Cumpli cabalmente cu bo trabou mescos cu e Gobierno aki tambe ta cumpli cabalmente cu bo”, tabata mensahe di Minister Glenbert Croes awe riba dia Internacional di Derecho Humano.