Den un acto recien di desesperacion y frustracion, parlamentario di AVP Arthur Dowers kende a haci maluzo di e oportunidad cu e politico di Corsou Gerrit Schotte a wordo encarcela siman pasa, a probecha pa scupi su gal berde contra nos lider Evelyn Wever-Croes, alegando cu den pasado nos lider lo tabatin lasonan di amistad cu e politico deteni Schotte. E hecho cu nos lider supuestamente lo a core cu sr. Schotte riba auto di campaña y a ser acompaña pa bay vota tabata e motibo ridiculo pa sr. Dowers purba na mancha e imagen integro di nos lider. Tambe cu su mentalidad di cochino, Dowers a menciona nomber di un otro persona “Toro” cu tabata wordo sospecha den contrabanda di baranan di oro kende supuestamente tambe lo a core campaña den jeep hunto cu nos lider. Ta p’esey lo ta bon pa awe nos di MEP refresca Arthur Dowers su memoria y cu pruebanan palpable mustra su persona di algun caso di personanan realmente dudoso, corupto cu tabata anda, negocia, fiesta y core paranda cu politiconan di AVP y en especial e ex-lidernan Henny Eman y Mike Eman.
Spartaco Ghini y rumannan Cuntrera
Ta con sr. Dowers ta considera e amistad di su ex-lider Henny Eman cu Spartaco Ghini cu tabata meti den e mafia, corupcion y escandalo di e hotel den ruina Beta na aña 1987/1988? Sr. Dowers no ta corda e proyecto di Beta, cu Spartaco Ghini a declara cu ta su custumber di duna 50 mil dollar y tur fin di siman e coruptonan di AVP tabata bay busca chequenan cerca e administrador Marachiolli? Esaki siguramente no tabata un simpel amigo Spartaco cu a acompaña Henny riba su jeep pa bay vota, pero a tene hemchi pa Henny ora di construccion di e hotel corupto Beta! E amistad aki finalmente a costa pueblo 216 miyon dollar cu mester a paga pa e escandalo y corupcion di e garantianan hotelero (SACE). Tambe lo ta bon pa Dowers bay puntra Henny Eman kendenan e tempo ey tabata e rumannan Cuntrera cu tabata deal y negocia cu e gobierno di AVP y di cual famia Eman tabatin un amistad y estrecho cu e rumannan mafioso aki!
Rincon, Gomez y Carvajal
Ta con sr. Dowers ta considera e amistad estrecho di su lider Mike Eman y otro politiconan di AVP cu figuranan dudoso manera Roberto Rincon, Kiko Gomez y el Pollo Carvajal y di cual mayoria di nan ta cumpliendo cu nan condena den prisonnan y esaki debi na tur nan actonan coruptivo? No tabata colega di Dowers mes, esta ex-minister de Meza tabata sinta negocia, come y bati kelki cu Rincon y Carvajal den un restaurant na Aruba? Y ki Dowers tin di bisa di e amistad estrecho di ex-Premier Henny Eman brasa hunto cu Kiko Gomez y ex-Premier Balkenende di Hulanda den un fiesta te ainda misterioso?
La luna que brilla y Diamante Negra
MEP ta recorda Arthur Dowers tambe con den añanan 90 Hulanda a manda Onno Koerten traha un rapport ariba Seguridad Nacional, unda a señala tur e miembronan di baho mundo cu relacion directo cu gobernantenan di AVP y cual a conduci na kita tur poder ariba Seguridad Nacional for di ex-Ministro di Husticia di AVP mediante KB di 22 di oktober 1994. E nombernan duna door di Merca na ex-Premier y ex-Minister di Husticia di AVP, esta “La luna que brilla” y “Diamante negra” no ta bisa Dowers nada? Con Dowers mester considera e amistad di e ex-ministernan di AVP cu tur e miembronan di baho di mundo aki? Cu nan tabata personanan cu simplemente a core campaña den un jeep cu e ex-ministernan di AVP?
E hechonan aki cu partido MEP a trece dilanti ta meramente un parti pa mustra Arthur Dowers e diferencia cu tin entre amistadnan incidental surgiendo den tur campaña electoral cu tur politico sin cu esaki tin compromisonan cu ta mara un pais financieramente y amistadnan cu metanan coruptivo cu ta desgracia un pais door di figuranan dudoso cu ta wordo busca pa husticia internacionalmente y cual figuranan semper a ‘wheel and deal’ cu nan amigonan di AVP y e rumannan Eman. Esun cu grawata ta haya hopi cos di hole!