Rumbastraat: Diabierna den oranan di mainta, presencia di polis ta wordo pidi cu hopi urgencia na e compania Fast Delivery, pa un asistencia cu un trahador cu ta depresivo.
Na yegada e polisnan ta topa cu un ambulance na e compania aki y ta mira cu e personal di ambulance tabata tratando un homber stranhero. Despues cu polis a nota cu tur cos tabata mustra calmo y nan a bandona e sitio.
Pero e problema na Fast Delivery no a caba eynan, despues a bin resulta cu e homber aki tin problemanan serio mentalmente, polis mester a bay bek na e compania y a detene e homber aki, paso e no ta solamente enfermo mentalmente pero tambe su papelnan no tabata na ordo y ta ilegal riba nos isla.
Polis, despues di a detene e homber, nan a transporte pa Guarda Nos Costa, pa asina Guarda Nos Costa por cuminsa cu e proceso pa regla su deportacion.Diasabra den oranan di mainta elo mester a wordo deporta pa su pais, tur cos tabata regla.
Diasabra mainta na momento cu Guarda Nos Costa mester a transporte pa aeropuerto ela cuminsa resisti y a lanta cu e trahadornan di Guarda Nos Costa. E homber no kier a coopera, mesora a yama polis, riba e parkinglot di Guarda Nos costa nan a logra domine y bisti’e e boeinan. Señora Trudy Hassel, hefe di Guarda Nos Costa tambe tabata presente na momento cu a logra domina e homber ilegal y a boei e.
E homber aki no kier a bandona Aruba y a resisti fuertemente pa e no wordo deporta, durante cu e tabata resisti ela haya un rasca banda di su wowo.
Tres ambulance a presenta na e edificio di Guarda Nos Costa, pa trata na atende cu e persona aki, pero e no kier a coopera. Ela wordo transporta pa Warda di Polis na Playa, pa asina un dokter bay eynan pa atende cune, pero ora e dokter a yega e homber cu ta a nenga tratamento medico.
Autoridad a trata den tur forma pa e homber haya un tratamento medico, pero e mes no tabata kier y no a keda nada otro di hibe bek Guarda Nos Costa, caminda ela wordo hinka bek den un cel y sigui e proceso pa mira con lo bay haci pa deport’e for di nos pais.
E no ta solamente un persona ilegal riba nos isla pero ta un persona enfermo mentalmente y tabata mustra basta agresivo, sigur e mester ta un persona cu lo mester su tratamento medico pa su problemanan mental cu e ta sufri di dje.
Otro hendenan trahando na e compania di Fast Delivery a confirma cu e homber aki tin basta tempo trahando cu e compania y ta usa e nomber di Euro, tambe no ta descarta e posibilidad cu lo por tin mas persona cu nan papelnan no ta na ordo trahando cu e compania aki, mirando cu no ta prome biaha cu e compania aki ta kibra ley y ta emplea personanan ilegal, algun tempo atras Guarda Nos Costa a bishita e compania aki y a pone man riba trahadornan ilegal.
E doño di e compania aki, lo mester sa mihor mirando su lasonan estrecho cu e tin cu Gobierno di Aruba. Ban spera cu pronto multanan cuminsa cay pa tur doñonan di trabou cu ta emplea personan ilegal.