Prome Minister Evelyn Wever-Croes ta celebra su fecha natal diaranson 5 di december. Pa e ocacion aki, tur mucha principalmente y henter pueblo di Aruba ta wordo invita pa bin celebra hunto cu Prome Minister su fecha importante den Caya Betico Croes, na ex-La Linda.
Diaranson atardi, cuminsando for di 5:30 pa 8:30 di anochi, lo tin diferente actividad den Caya Betico Croes pa nos muchanan disfruta hunto cu Prome Minister. Lo tin popcorn y suikerspin gratis. Kerekentenchi bou direccion di Lyonell Dirkzs lo anima nos muchanan cu nan diferente actividadnan. Tambe nos muchanan lo haya e oportunidad pa cera conoci cu e MoB-Lab cu lo ta stationa tambe den Caya Betico Croes. Y pa duna e ambiente un toke special, Sinterklaas tambe lo ta presente acompaña pa su Pietnan, pa celebra su fecha special hunto cu Prome Minister.
Grupo di Betico tambe lo tey pa entretene e publico cu nan canticanan di fin di aña.
Pa e ocacion aki, mayoria tiendanan lo keda habri tambe pa asina pueblo por probrecha pa haci compras.
Durante e orario menciona, Stichting ‘Crossing For Hope’ lo ta presente tambe pa recauda fondo pa asina sigui cu nan meta pa yuda Wilhelmina Kankerfonds. E 5 landadonan cu a landa for di Venezuela pa Aruba hunto cu boluntarionan di Wilhelmina Kankerfonds lo acerca publico cu ta desea di aporta na e causa bunita aki.
Ta di remarka y admira, cu Prome Minister Evelyn Wever-Croes ta celebra su fecha natal sin uza recurso financiero di Gobierno manera cu a pasa cu e Prome Minister anterior. Pa Premier Wever-Croes, esaki ta algo personal di dje por lo tanto e kier celebra su fecha natal cu henter Aruba bou su mesun gasto tambe. Di e manera aki cumpli cu integridad door di no uza placa di pueblo pa cosnan personal.
Gobierno di Aruba ta felicita Prome Minister Evelyn Wever-Croes riba su fecha natal y ta desee forsa pa sigui traha pa progreso y bienestar di nos pais.