Un sistema di impuesto mas simpel y mas husto
ORANJESTAD – Ayera Minister di Finansa, Asuntonan Economico y Cultura hunto cu Minister President a presenta na Pueblo oficialmente e promer fase di e reforma fiscal pa nos Pais. Un trabao inmenso haci den e poco tempo. Hopi a yega di papia di reforma fiscal, pero no tabata kier a sali di nan zona di confort pa por a haci un reforma posibel.
Gabinete Wever-Croes ta mira e nececidad pa Aruba por tin un sistema di impuesto mas simpel y mas husto y pesey hunto cu Aruba su profesionalnan di Departamento di Impuesto, Aduana, Oficina Central di Estadistica y Departamento di Legislacion a traha duro pa asina por presenta un mihor manera fiscal pa Aruba.
E reforma lo tuma lugar den fase pa asina brinda espacio pa su implementacion debido. En corto por bisa cu den su promer fase desde 1 di januari 2019, 30 mil hende no lo paga loonbelasting, 25 mil hende nan loonbelasting lo baha, 12 mil hende no lo paga grondbelasting y 16 mil hende lo conoce rebaho di nan grondbelasting.
E mundo comercial tambe lo recibi un rebaho den forma di rebaho di impuesto riba dividendo cu ta baha di 25 pa 10%. Pa haci e reforma posibel, lo haci algun cambio den e tarifa di grondbelasting y tabaco y alcohol destila lo conoce un aumento. Di e manera aki ta purba na yega na un sistema fiscal mas simpel y mas husto pa nos Pais.