Minister di Turismo, Salubridad Publico y Deporte ta preocupa cu e scarsedad di specialistanan na Aruba.
Esaki tin como consecuencia cu e tempo di espera pa bay un specialista ta tarda entre 3 pa 6 luna. Verwijzing pa un specialista no por ta algo cu ta tarda. Minister Dangui Oduber ta haña esaki un situation indeseabel, pero mas aun uno peligroso ora ta trata di salud di e pashent.
Den e reunion di urgencia ultimo cu Minister Dangui Oduber tabata tin cu HOH y AZV Minister a urgi gerencia di Hospital pa haci nan maximo esfuerso pa yena e vacaturanan aki lo mas pronto posibel.
Pa e motibo aki Minister Dangui Oduber por medio di un carta, siman pasa, ta manda pidi HOH un splicacion di con leu nan ta cu e “recruitment” di specialistanan na HOH. Ta urgi pa buska activamente specialistanan, preferibelmente Arubiano (yuinan di tera) den exterior y haci maximo esfuerso pa atrae nan pa Aruba.
Den e carta aki Minister Dangui Oduber tambe ta manda pidi gerencia di HOH pa duna Minister un splicacion di e procedura cu HOH ta encamina na momento di “recruit” y tuma un specialista den servicio di HOH. Ta conoci tambe cu e tempo di espera na Eerste Hulp ta sumamente largo. Akinan tambe Minister a pidi e gerencia di HOH un splicacion kiko ta e plan cu HOH tin pa reduci esaki.
E pashent merece e mihor calidad di cuido y un di e indicatornan pa logra esaki ta pa reduci e tempo di espera pa wordo “verwezen” na un specialista y na Eerste Hulp.