Bushiribana – Diadomingo mainta den careda di 11’or polis y tambe ambulance ta wordo manda pa Bushiribana, altura di e ruina pa un UTV cu a bolter y tin hende herida.
Na yegada berdad patruyanan ta topa cu un UTV ariba su banda, y un cabayero seriamente herida pero na tino. Segun nos a compronde, manera den otro casonan anterior e cabayero turista aki a bay haci wega cu e vehiculo.
Dus ela bay draai e, pero no a mira un buraco den e tera y e wiel ta pega causando cu e UTV ta perde control y bolter di banda.
E turista ta herida su mes seriamente, ela perde algun dede y tambe a fractura su pia drechi. Por a mira e weso visibel. Paramediconan a stabilise prome y despues a hinke den ambulance pa bay hospital, caminda cu elo mester wordo opera.
Varios UTV a accidente e siman aki
E siman aki varios UTV a bolter. Si nos no ta ekiboca, esun di awe diadomIngo ta e di 3 of 4. Esnan cu ta huur e UTV nan aki mester adverti turistanan di e peligernan si nan bay haci wega cu e vehiculonan.