E REFORMA FISCAL LO TRECE ALIVIO PA E CLASE TRAHADO Y PENSIONADO
Na inicio di gobernacion di Gabinete Wever-Croes, a bin encontra cu retonan financiero grandi cu mester a wordo studia debidamente pa asina pasonan por a wordo tuma pa e bienestar y miho futuro di nos pais. Inmediatamente, Gobierno a busca informacion riba e poder di compra di cada ciudadano siendo esaki bou di hopi presion y ainda ta especialmente despues di e crisisheffing temporal cu Gobierno mester a introduci.
Prome Minister Evelyn Wever-Croes ta encurasha pueblo di Aruba pa para keto y realisa cu e crisisheffing temporal no a bin di un dia pa otro como sifuera e tawata facil pa bin cu n’e. E crisisheffing temporal a bin a causa di un deficit financiero hopi mas grandi cu Gobierno a premira. Un deficit financiero causa door di e maneho iresponsabel di gobierno anterior di AVP, cu a haci cu pasonan fuerte mester a wordo tuma na e momento cu esaki a wordo tuma pa asina cuminsa bay bek den e rumbo cu Aruba mester ta.
E prome paso cu Gobierno a tuma ta di cuminsa cerca cada Minister di Gabinete Wever-Croes bahando gastonan den nan oficina. Despues a sigui cu departamentonan di Gobierno. A indica cu Companianan Estatal tambe mester baha gasto.
Mientras tambe a busca den e sistema di Impuesto pa wak unda por evita cu placa ta sali for di Aruba sin cu hende paga nan ‘fair share’. Sinembargo, Gobierno di Aruba a realisa cu esaki tampoco tawata suficiente pa cera e buraco financiero. A realisa tambe e cantidad di placa cu Aruba mester bay paga pa e Proyectonan PPP tur aña pa motibo di compromisonan di e Gobierno anterior. Tur esaki tawata un indicacion na Gobierno cu mester haci mas pa tapa e buraco financiero.
Dia 1 di juni Gobierno a introduci e crisisheffing temporal cu e compromiso pa trece un alivio pa nos pueblo. Y cu e meta aki Gobierno di Aruba ta trahando dia y anochi. E alivio aki, Gobierno di Aruba lo trece cu e introduccion di e Reforma Fiscal. Un reforma di Impuesto mas husto pa nos pueblo cu lo elimina e crisisheffing.
Prome Minister: “E Reforma Fiscal ta un proyecto cu lo tuma su tempo. Pero e pasonan cu Gobierno ta tumando pa yega na un sistema di Impuesto mas husto ta firme y realistico pa trece solucion pa nos problema financiero. Gobierno ta trahando duro pa asina introduci e prome paso di Reforma Fiscal na final di aña y asina Aruba por habri un aña nobo yen di energia y posibilidad pa nos pais”.