Tabata pa e titular di Asunto Social y Labor Minister Glenbert Croes un honor di por a cera e acuerdo cu un instancia internacional asina importante y respeta, cu ta dispuesto pa yuda Aruba logra e maximo solucion den un aspecto asina importante di e Crisis Plan Social, esta e siguridad di nos muchanan.
Despues di e ‘quick scan’ cu Unicef a haci for di 13 pa 23 di augustus ultimo, nan a yega na e conclusion cu e parti cu mas Aruba mester di asistencia riba dje, ta den crea un sistema di proteccion pa muchanan. Aki ta unda cu Unicef activamente lo participa den asisti Aruba.
Tin algun punto cu a resalta den e resultado di e ‘quick scan’ cu Unicef a haci na Augustus:
- Tin un necesidad grandi pa cambia norma y conducta riba criansa di nos muchanan.
- A resalta cu hopi mayor y abuelonan ta pidi ayudo y apoyo con pa atende cu muchanan cu ta dificil hasta violento
- Acceso entre servicio- y departamentonan ta bay cu hopi dificultad. Mester un mihor cooperacion entre departamento- y instancianan.
- No tin registracion ni data riba casonan cu tin di haber cu mucha
- Legislacion riba proteccion y husticia pa mucha mester wordo investiga y adapta pa sigura proteccion contra abuso y negligencia.
- Mester di mas instancia unda por ubica un mucha victima di abuso sexual y negligencia
- Servicio pa muchanan cu adiccion, pa muchanan cu mester di guia psyciatrico ta masha limita na Aruba
Ta riba e puntonan aki Unicef cu Aruba lo traha hunto pa por yega na solucionnan sostenibel y duradero.
Minister Glenbert Croes, cada momento, cada instante cu e por e ta recorda nos tur riba e tragedia cu a rementa den nos cara na 2017 unda cu dos criatura a fayece victima di violencia. Ta e momento ey cu Gobierno a hacie su mision pa ofrece proteccion na nos muchanan. Ta pa e mandatario inaceptabel cu abusadornan ta sali liber pa fayonan tecnico of falta di prueba. E daño cu ta haci na nos muchanan ta manca nan alma pa resto di nan bida. Y si tin un cos cu Gobierno kier logra ta e ‘vangnet’ social familiar como tambe e ‘vangnet’ legal pa nan proteccion. “It takes a village to raise a child’ pues ta un responsabilidad cu ta toca nos tur como mama, tata, ruman, omo, tanta, abuelo, amigo y bisiña pa cuida y proteha nos muchanan. Bo wak algo inusual raport’e di biaha na Bureau Sostenemi cu awo tin yamada gratis na telefon 588-1010.
E mandatario ta contento cu e logro aki ya cu Unicef y Aruba lo logra hunto e maximo proteccion pa tur nos criaturanan.