ORANJESTAD – “Na Aruba dos di cada cinco hende muher ta victima di violencia domestico. Tur acto di violencia domestico ta un problema cu ta encera henter un comunidad y ta afecta cada un di nos”. Esaki parlamentario Sue-Ann Ras (MEP) a bisa, referiendo na estadistica mundial, unda cu 1 di cada 3 hende muher ta bira victima di violencia domestico. ” Y lamentablemente na Aruba e cifra ey casi ta mescos”, Ras ta sigura. E ta basa su mes riba loke Fundacion Hende Muher Den Dificultad tin como promedio, ya cu no tin dato recien di esaki, door cu no tin un punto central pa meld y registra e casonan.
VIOLENCIA NA CAS
E violencia cu nos ta wak of experiencia riba caya, na scol of comunidad, ta cuminsa na cas” Ras ta sigui bisa. No ta solamente e personanan cu ta confronta directamente cu violencia, ta esunnan cu ta sufri, sino esunnan cu ta rond di dje tambe. Specialmente e muchanan, cu ta presencia e actonan aki! E parlamentario a toca e tema aki relaciona cu e hecho cu diadomingo ultimo, 25 di november tabata Dia Internacional Contra Violencia di hende muher y mucha muhe. Y basa riba esaki, Fundacion Hende Muher den Dificultad a inicia e campaña Orange Aruba pa sigui traha riba conscientisacion di violencia domestico.
NACE ABUSADOR?
Durante e lansamento di campaña, presidente di FHMDD Suzy Kock a bisa cu nos mester ta consciente cu niun hende no ta nace un abusador ni victima, sino cu e ta bira un abusador. Ta comproba cu e personanan cu ta sufri di violencia domestico, tin mas probabilidad pa sufri di depresion, ansiedad, stres, trastorno di soño y trastorno alimenticio y desorden mental. Sin laga afo e chensnan pa tin problema di salud; derame celebral, enfermedad cardiaco, asma y tambe tin mas probabilidad di sufri di e problemanan di abuso di substancia.
RISICO DI VIOLENCIA DOMESTICO
Mundialmente 3 pa 4 miyon di mucha, entre 3-17 aña, ta den risico di violencia domestico y ta testigo. “E muchanan cu ta testigo di violencia domestico tin mas probabilidad di ta den un relacion abusivo, ora nan crece, ya sea cu un persona cu ta comete abuso contra nan of cu nan ta bira e abusador” Ras a bisa. Keda pendiente pa un continuacion di e topico aki.