ORANJESTAD, Aruba – Aruba Hotel & Tourism Association (AHATA) a tene nan AHATA’s Excellence Awards anual pa reconoce e empleadonan mas impresionante den sector di turismo. Miembronan di AHATA ta emplea como 10,000 persona local, y pa 2018 nan a nomina e 48 di nan miho nan pa e honor di AHATA Excellence Awards.
CEO di AHATA, Tisa LaSorte a ricibi tur nominado y nan invitado na nan yegada di e ballroom di The Ritz-Carlton Aruba. Nominadonan a sinta hunto cu nan coleganan y gerente pa gosa di un anochi espectacular, yen di aprecio pa nan contribucion na e exito di Aruba su turismo. Durante palabranan oficial di bonbini, Tisa LaSorte a gradici Minister di Turismo, Danguillaume “Dangui” Oduber , pa su presencia, y a anuncia cu e anochi elegante ta specialmente pa reconoce e pilar di nos turismo, e elemento humano; nos hendenan.
Tabatin un hurado di 3 persona independiente y imparcial den sector turistico cu a entrevista cada nominado den ultimo simannan y selecta ganadonan pa 5 categoria. E hunta di directiva di AHATA a selecta e ganado pa Lifetime Achievement Award.
Maestro di Ceremonia, Larissa Bermudez a gradici e sponsor di e cena y celebracion, De Palm Tours, y despues a yama e nominadonan riba escenario pa ricibi nan certificado mientras ta pasa un video di cada persona.
Durante e evento yena cu suspenso a anuncia e siguiente ganadonan: “Employee of the Year”: Berlinda Engelhardt, Navigator na Renaissance Aruba Resort & Casino; “Supervisor of the Year”: Shemuel Koolman, Assistant Rooms Operation Manager na Aruba Marriott Resort & Stellaris Casino; “Manager of the Year”: Barbara Nieuwmeyer-Bregita, Senior Sales Manager na De Palm Tours N.V.; “Young Tourism Professional of the Year”; Axl Jordy Ismail, Director of Casino Operations na The Ritz-Carlton, Aruba; “Sustainability Champion”; Nathaly Stanley, Sustainability Manager na Bucuti & Tara Beach Resort; “Lifetime Achievement Award”; Beverly Williams Perez, Banquet Manager na Hyatt Regency Aruba Resort, Spa & Casino.
AHATA a premia cada ganado cu un escultura original y simbolico di artista local Gilbert Senchi. Tur e nominadonan tambe a ricibi regalo.
Durante e anochi a entrega 2 check, un pa Colegio EPI unidad di HORECA y e otro pa Universidad di Aruba, facultad di Hospitality & Tourism Management. Armin Solognier, representante di Caribbean Mercantile Bank (Senior Business Developer), a entrega e donacion na e scolnan pa yuda cu educacion den HORECA. Na final di anochi tur presente a disfruta di e musica di NBO.
Directiva di AHATA ta gradici e sponsor De Palm Corporation pa un biaha mas haci e celebracion di AHATA’s Excellence Award posibel y tur e nominadonan pa nan compromiso cu excelencia.