Awe nos ta recorda 32 aña di fayecimento di Betico Croes. Un lider, un estadista, nos libertador. Pa mi, mi omo y mi padrino, cu a bay demasiado hoben.
32 aña pasa mi tabata studiando na Hulanda ora e yamada a drenta cu Betico a fayece. Hunto cu mi primo Glenbert, nos a bai Utrecht mesora. Nos no por a kere. Aruba a yora su lider y a demostra cu e tabata un gran lider di berdad.
Awe, 32 aña despues, ainda nos ta haya su falta. Specialmente den ultimo dianan cu mi tabata na mesa di negociacion cu Hulanda, mi a wordo inspira pa Betico, y e forma con el a negocia cu Hulanda. Y no simplemente pasobra ta mi omo y padrino. Sino pasobra Betico tabata un persona cu vision, no un vision con e por engrandece su mes, sino un vision con su pueblo por wordo engrandeci.
Esaki ta e principio cu ami ta hiba cu mi tur caminda. Y p’esey mi por a bisa Hulanda cu si no tin nada aden pa mi pueblo, nos no ta interesa den un protocol.
Awe, 32 aña despues ainda nos ta lucha pa conserva nos autonomia, hasta awor mas cu nunca despues cu e propio Gobierno di Aruba, e gobierno di AVP, a entrega nos autonomia.
Cu e mesun fervor cu Betico a lucha, cu e mesun firmesa di pone su pueblo prome y cu e mesun diplomacia cu el a aplica cu Hulanda, ami lo sigui lucha pa Aruba mantene e autonomia cu nos tin awor y pa gana e autonomia cu a bay perdi.
Aruba ta agradecido y bendiciona cu nos a conoce un Lider asina grandi, cu a logra cosnan grandi pa su pueblo.