Diahuebs ultimo gobierno di Aruba a firma un protocol financiero cu Hulanda pa e añanan 2019 te cu 2021. A palabra normanan di presupuesto nobo basa riba e memorandum economico financiero di Gobierno di Aruba.
Segun Prome Minister Evelyn Wever-Croes esaki ta trece nos un paso mas cerca di gana nos autonomia financiero bek. Dicon?
PROTOCOL 2015
Den e protocol di 2015 firma entre Gobierno di AVP y Hulanda, Mike Eman a entrega nos autonomia financiero y a mara Parlamento den su palabracionnan.
El a yega na palabracion di normanan di presupuesto totalmente irealistico. Esey ta pasa ora abo como Gobierno no tin un plan y no tin vision. Gobierno di Mike Eman probablemente a kere cu papia bunita ta saca su Gobierno di problema.
Den caso di e protocol 2018 nos tabata hopi bon prepara. Cu nos propio maneho den ehecucion caba, cu prueba den man, y sin papiamento bunita pero papiamento al caso, nos a impone nos norma y nos maneho. Claro cu no ta facil pero e ta mihor cu si Hulanda a impone norma pa nos. Cu esaki pues ta nos maneho ta prevalece atrobe.
BEGROTINGSKAMER
Den e protocol di 2015 gobierno di Mike Eman a bay di acuerdo pa un organo Hulandes supervisa nos finansas publico. Den e protocol di 2018 Gabinete Wever-Croes a inclui cu e organo Hulandes ey lo wordo reemplasa pa un organo Arubiano. A pone e palabranan acerca: pa enfatisa e autonomia di Aruba, Hulanda lo no propone ningun miembro den e Begrotingskamer. Esaki ta ehempel perfecto di autonomia, cu lo bira realidad dentro di 3 aña.
PARLAMENTO TA INDEPENDIENTE
Den e protocol di Gabinete Mike Eman na 2015 el a mara e organo mas importante di Aruba cu ta Parlamento cu no por tuma ningun decision. Un protocol den cual un Gobierno ta haci palabracion cu un otro Gobierno, pa cambia leynan, ta contra tur respet pa Parlamento.
Un Gobierno por haci palabracion cu otro Gobierno cu ta bai presenta un cambio na Parlamento pero no por compromete cu e cambio ey ta pasa. Pasobra Parlamento tin e ultimo palabra.
Esaki si ta e caso den e protocol di 2018. Nos a haci palabracion entre e Gobiernonan cu lo presenta e cambio di Laft na Parlamento, y asina duna Parlamento su espacio.
AUTONOMIA
Por cierto, den e protocol 2015 Gobierno di Mike Eman a palabra cu pa cada cambio di ley di Laft Gobierno mester di aprobacion di Conseho di Minister di Reino. Asina tin mas palabracion haci den cual a entrega e autonomia financiero na Hulanda.
Cu e protocol actual nos ta ganando nos autonomia bek.
Entre otro Aruba lo cuminsa prepara su propio Begrotingskamer pa tuma over di Caft. Tambe lo evalua funcionamento di Caft den ultimo añanan.
Pues nos a cuminsa cana e caminda pa gana nos autonomia financiero bek.
Y nos ta hopi orguyoso di esaki.