Diahuebs 29 di november Minister Glenbert Croes lo recordanan durante un acto solem.
E siman aki lo recorda e di prome aña cu e angelitonan Rishandroh y Roshandrick a bai laga nos, 24 di november y 28 november, 2017 respectivamente. E dia aki ta trece memoria di un tragedia cu a ocasiona hopi dolor na e famia, e amistadnan y a conmove e comunidad di Aruba completo. Na mes momento, e siman aki mester yena nos cu mas determinacion pa traha mas duro ainda pa un tragedia asina no ripiti nunca mas. Rishandroh y Roshandrick qepd. ta representa tur e muchanan cu por ta pasando den un of otro forma di abuso cu mester di nos atencion.. Semper mester stima, respeta, proteha y brinda e siguridad necesario na nos muchanan. Hunto nos mester keda enfoka riba e importancia di proteha nos muchanan y respeta cu nan inocencia ta e regalo mas bunita cu nos a ser bendiciona cu ne.
E maneho di Gabinete Wever Croes ta enfoka riba e aspecto pa trece cambio den e crisis social cu ta tumando luga den nos comunidad acumula pa varios decada caba. Den e maneho aki Minister Glenberr Croes a institui e proyecto di plan di crisis social cu e fondonan necesario pa atende cu e crisis social y cu meta pa tur esnan trahando riba e tereno social traha mas estrecho cu otro pa asina trece alivio y solucion na esunnan mas vulnerabel den nos comunidad.
Minister Glenbert Croes y su ministerio, den contacto cu e famia di e angelitonan, a laga drecha e kelder cu ta e ultimo luga di sosiego di Rishandroh y Roshandrick qepd. Diahuebs mainta dia 29 di november proximo, Minister Glenbert Croes lo planta dos mata na memoria di e dos angelitonan durante un acto solem na e pleintje banda di Makro na San Nicolas. E pleintje aki lo ser dedica na nan y na tur esnan cu a pasa of ta pasando den un of otro tipo di abuso. Nos no lo lubida Rishandroh y Roshandrick nunca. Ministerio di Asuntonan Social y Labor hunto cu tur departamento y fundacionnan trahando riba e tereno social lo para keto na e fechanan aki y ta sigui determina dilanti cu un meta, esta di sigui traha mas duro pa victimanan di abuso.