ORANJESTAD – Como parlamentario, Daphne Lejuez a ricibi varios pregunta dicon Parlamento di Aruba a desaproba e ley cu ta trata e saldo di cuenta anual 2016. Akinan e parlamentario ta sigui elabora riba e di dos parti pa locual ta e tema.
Falta di declaracion di accountant
Sinembargo, mientras cu a cuminsa bon, nos mester percura pa nos keda riba e bon caminda. Y te cu awe ningun gobernacion desde Status Aparte a logra un declaracion di accountant pa cuentanan anual di nos pais, ni a logra enfoca riba e responsabilisacion di ministernan pa cu e cuentanan anual, pero solamente a trata na stipula e saldo di e cuentanan anual por medio di un ley den Parlamento, y di e forma aki, na un forma indirecto, dunando ministernan décharge sin mester di responsabilisa nan mes pa e maneho financiero hiba. Pa yega na un declaracion di accountant, CAD ta controla e administracionnan di tur departamento gubernamental y ta conseha tocante maneho di risico riba e tereno di:
– Confiabilidad den dunamento di informacion financiero y operacional;
– Efectividad y eficiencia di e proceso di trabou;
– Seguridad di propiedad;
– Cumplimento di ley y areglo di contracto.
Surpaso den cuenta anual 2016
Biniendo bek riba e cuenta anual 2016, e sector colectivo pa 2016 no por a wordo calcula pa entre otro falta di informacion y como tal no por substancia cu en berdad e norma proponi a wordo alcansa, ni cu e cifranan ta duna un representacion corecto, ya cu varios di e instancianan cu ta forma parti di e sector colectivo tin cuentanan anual atrasa cu falta di wordo entrega.
Pues si Parlamento wordo presenta cu un conseho unda cu tin un maneho financiero deficiente, cu falta di splicacion y responsabilisacion pa entre otro gastonan cu ta surpasa e autorisacion legal duna pa Staten y cu ta en pugna cu comptabiliteitsverordening (ley di contabilidad), nos tin di asumi cu e accionan tuma pa yega na e saldo di e cuenta anual ta corecto, y cu esaki tambe e saldo?
Por ehempel, si constata awo cu cierto gastonan haci sin autorisacion – cu no por wordo rasonablemente responsabilisa – no ta cay mas pa cuenta di Pais Aruba, si no pa e Minister responsabel, esaki lo no altera e saldo? Pasobra aprobando e saldo, nos ta aproba tambe e forma cu a yega na e saldo?
Conclusion
Despues di a constata tur e hechonan ariba, e ta subraya basicamente pakico, como Parlamento responsabel, no por aproba e ley pa constata solamente e saldo di cuenta anual 2016, sin cu prome Parlamento a haña e oportunidad pa pidi gobierno/ministernan responsabilisa e maneho cu a hiba na e resultado, particularmente si e resultado aki ta desvia di e aprobacion presupuestario legal otorga pa Parlamento.
A bira tempo pa gobierno presenta un plan integral acompaña pa un “tijdlijn”, con si ta bay logra un mehoracion den maneho financiero di awo pa dilanti y kico esaki lo rekeri na fondo y personal – paso si nos kier papia di bon gobernacion y un maneho financiero na ordo, unda cu Parlamento por eherce “Budgetrecht”, nos mester cuminsa un caminda. Haciendo esaki tambe lo elimina e necesidad pa un organo di control financiero externo manera Caft pa vigila cu nos ta haci lo corecto – algo cu aparentemente na 2016, cu tawata e prome aña presupuestario cu a cay full bao di Caft, asina mes no a duna e resultado acorda mirando e contenido di e cuenta anual di 2016. “Gobernacion ta continuacion, pues e ta keda na Parlamento awo pa cuminsa invita gobierno pa, na un forma structural y como parti di e ciclo presupuestario, responsabilisa su mes a base di e cuentanan anual prome cu Parlamento aproba e saldo, asina aki dunando Parlamento e oportunidad di por eherce su trabou di controla si ta usa fondonan di pueblo corectamente. Esaki ta nos deber como representante di pueblo”, Parlamentario Lejuez ta subraya.