E enfoke e aña aki di Rotary Club of Aruba ta riba e derechonan di nos muchanan. Mirando e desaroyonan ultimo tempo riba nos isla y den nos comunidad, e topico di derechonan di mucha ta keda bin dilanti. Na momento cu Telefon pa Hubentud a aserca Rotary Club of Aruba cu e iniciativa “Esaki ta mi Derecho”, mesora a dicidi pa participa den esaki.
Diamars 20 di November, Dia International di Derecho di Mucha, Rotary Club of Aruba tabata tin un stand den e carousel di Telefon pa Hubentud. E stand ta enfoca ariba Articulo 31 di Derecho di Mucha, cual ta “Tur mucha tin Derecho di Hunga y Tempo Liber”. Door di esaki tambe e muchanan por a hunga un wega di beach futbol cu otro.
Presidente di Rotary Aruba, Edsel Lopez ta felicita Telefon pa Hubentud cu nan di 19 aña di existencia. Sigur cu e trabao di Telefon pa Hubentud ta uno esencial pa duna sosten na nos muchanan y hobennan.