Awor cu e partidonan MEP-POR-RED dia 17 di November ultimo a cumpli nan prome aña di gobernacion y despues cu e opositornan di AVP a pronostica cu e gobierno actual lo no wanta subsecuentemente 1 luna, 3 luna, 6 luna y ni 1 aña di gobernacion, e opositornan aki den nan ansha y desesperacion ta sigui cu nan fulminacion y calumnia contra Gabinete Wever-Croes. Segun nan, tur cos a bay malo riba tereno financiero economico durante e ultimo aña y cu hopi odio y rabia tur dia nan kier sigui venena mente di pueblo cu nos pais a conoce un recesion economico bao di e gobernacion actual. Sinembargo e ignorantenan aki ta lubida di splica pueblo cu nos por papia solamente di recesion economico ora cu tin un caida di e GDP real durante dos aña consecutivo, cual siguramente no ta e caso na e momento aki.
Prome aña di Gabinete Eman
Ta p’esey partido MEP ta trece un comparacion di e prome aña di Gabinete Mike Eman (2010) cu e prome aña di Gabinete Wever-Croes (2018) haciendo uzo di algun indicador importante riba tereno economico y financiero. Nos mester constata cu den e prome aña di Gabinete Mike Eman nos GDP nominal a sufri un caida di 194 miyon florin, esta di 4473 miyon na 2009 te 4279 miyon na 2010; nos crecemento economico (GDP Real) na 2010 tabata hopi negativo: -3.4%; nos deficit financiero a aumenta cu 26 miyon florin, esta di 163 miyon na 2009 te 189 miyon na 2010 y nos debe nacional a aumenta cu 171 miyon florin, esta di 2230 miyon na 2009 miyon te 2401 miyon na 2010.
Prome aña di Gabinete Wever-Croes
Den e prome aña di Gabinete Wever-Croes nos GDP nominal a crece cu 138 miyon florin, esta di 4793 miyon na 2017 te 4931 miyon na 2018; nos crecemento economico (GDP Real) tabata -0.5% na 2018; nos deficit financiero a baha cu 8 miyon florin, esta di 155 miyon na 2017 te 147 miyon na 2018 y nos debe nacional a aumenta cu 49 miyon, esta di 4159 na 2017 te 4208 miyon den e di dos kwartaal di 2018.
Herencia desastroso laga atras pa AVP
Pues analisando tur e cifranan aki, un y tur mester por conclui cu Gabinete Wever-Croes den su prome aña siguramente a haci un tremendo trabao compara cu Gabinete Mike Eman. Alavez no mester lubida cu na 2009 ora cu e gobierno di AVP a asumi mandato nan a haya un caha di gobierno cu 970 miyon florin extra cu a ser laga atras pa Gabinete Oduber, esta e placa di Plant NV, BBO di Valero, placa di FDA etc. Y contrario na esaki, na 2017 Gabinete Wever-Croes a hereda un caha di gobierno blo bashi, cu solamente rascanan di huña y debenan biyonario cu tin cu wordo paga den e proximo 25 añanan. Pues e hecho aki ta pone e politiconan di AVP den un spot mas negativo ainda: Haya 970 miyon florin extra sin sacrifica un dia pe y asina mes crea tur e debenan biyonario, anto cu hopi orguyo.
Cu esaki tambe partido MEP cu cifranan concreto a bolbe desbarata tur e ponencianan ridiculo di partido AVP fomenta durante e ultimo dianan aki.