No tin palabra pa describi e estupidez treci padilanti door di e parlamentario di AVP Marlon Sneek, caminda recientemente el a scupi su gal contra Minister Dangui Oduber, bisando cu “e minister aki a drumi 4 aña y no sa kico a wordo haci pa deporte”. Den su letania sin pia y sin cabez, Marlon Sneek no a splica cu ya pa 1 aña caba e fundacion cu semper tabata e vehiculo principal pa stimula deporte y crea e infrastructura necesario, esta Lotto pa Deporte a wordo secuestra door di poco haragan liga na partido AVP kendenan no kier duna honor na nan mes y retira for di directiva manera ta usual ora di cambio di gobierno. Un directiva sinberguensa cu na vispera di eleccion a percura pa cambia e statutonan di Lotto pa Deporte y p’asina nan mes por a nombra nan mes pa bida largo. Aki si Marlon Sneek no ta conta pueblo con e directiva aki a percura pa laga deporte na Aruba sangra y muri y ta rancando anualmente mas di 500 mil florin for di caha di Lotto pa nan propio beneficio y probecho. Pa no papia mes di tur e camaranan di siguridad costoso cu nan a laga instala na tur nan casnan riba custia di Lotto pa Deporte.
Ningun construccion deportivo, 2010-2017
Den su comunicado ultimo Marlon Sneek sin ningun tiki di berguensa a presenta un lista di supuesto proyectonan cu su gobierno corupto di AVP a ehecuta den 8 aña. Aki el a menciona con nan a percura pa un training machine, algun donacion, renobacion di algun veld deportivo, algun backstop y tribuna, algun battingcage y algun mini turf pa veldnan deportivo. Sinembargo den e lista aki e no por a menciona ni sikiera un solo compleho deportivo cu a ser construi den 8 aña di gobierno di AVP, siendo cu Lotto pa Deporte a genera mas di 400 miyon florin na entrada den e 8 aña aki. Tambe ningun mantencion di e complehonan deportivo a ser ehecuta y awe mayoria di nan ta den un estado deplorabel y bergonsoso, danki na e gobierno cu Marlon Sneek a defende ciegamente.
Construccionnan deportivo, 2002-2009
Lo ta bon pa refresca Marlon Sneek su memoria kico e gobiernonan di MEP (2002-2009) a haci pa loke ta e infrastructura deportivo: 1. Construccion di Compleho Deportivo Frans Figaroa na Noord, 2. Construccion di Sporthotel, 3. Construccion di Parke Deportivo y Recreativo na Jaburibari, 4. Construccion di Compleho deportivo na Simeon Antonio, 5. Construccion di Compleho deportivo na Jara, 6. Renobacion di Compleho Deportivo Guillermo Trinidad, 7. Construccion di Parke di Baseball na Santa Cruz, 8. Construccion di Little League Ball Park na Pos Chikito, 9. Construccion di Stadion di LIFIDA na Savaneta, 10. Renobacion di Parke Recreativo na Esso Heights, 11. Cancha di basketball na Dakota. Tur e construccionnan aki siguramente a rekeri miyones y miyones di florin cu a sali for di tur e entradanan di Lotto pa Deporte. Fuera di tur e construccionnan aki no mester lubida tambe con e gobierno di MEP a percura pa e organisacion di Olimpiada Escolar tur aña, compra di material di deporte pa tur scol, subsidio y donacion na Idefre, instructornan di deporte na 18 scol basico y luznan pa un sin fin di canchanan deportivo.
Lamentablemente e gobierno actual no por sigui inverti den deporte manera mester ta ya cu e AVP-istanan den e directiva di Lotto pa Deporte tin e fundacion aki secuestra y e placa genera pa Lotto no ta wordo destina pa nos deporte, pero pa nan propio beneficio.
Sinembargo tin luz na horizonte na momento cu e gobierno actual bin cu su propio Lotto y p’asina muy pronto tur e entradanan genera lo wordo destina pa nos deporte manera cu tabata e caso durante 2001-2009.